Calin Georgescu, kandidati pro-rus që fitoi zgjedhjet presidenciale të nëntorit në Rumani, të cilat u anuluan më vonë, u arrestua nga policia. “Georgescu ishte gati të paraqiste kandidaturën e re për presidencë. Rreth 30 minuta më parë u ndalua në trafik, për t’u marrë në pyetje në Prokurori. Ku është demokracia, ku janë partnerët që duhet të mbrojnë demokracinë?”, thuhet në një postim në Facebook të liderit që kandidoi si i pavarur në nëntor, e që konsiderohet i ekstremit të djathtë.
Georgescu thuhet se u mor në pyetje në lidhje me financimin e fushatës së tij zgjedhore vitin e kaluar. Hetuesit rumunë dyshojnë se Rusia ndikoi në votim. Megjithatë, Elon Musk dhe Liga në Bruksel, e mbrojnë atë, duke e konsideruar situatën shqetësuese.
Hetimi
Sipas kanalit rumun të lajmeve Digi24, prokurorët lëshuan një urdhër arresti kundër tij dhe filluan të kontrollonin ambientet e bashkëpunëtorëve të tij më të afërt e të truprojave. Hetuesit dyshojnë se të paktën 27 persona, vepruan kundër rendit kushtetues të Rumanisë dhe mund të jenë përgjegjës për nxitje publike, duke krijuar një organizatë fashiste e duke bërë deklarata të rreme, rreth burimeve të financimit të fushatës. Megjithatë, askush nuk e ka përmendur drejtpërdrejt emrin e Georgescu-t apo të bashkëpunëtorëve të tij.
‘Operacioni synon të ndalojë kandidaturën time të re’
Megjithatë, pak pasi u publikua lajmi për bastisjen e sotme, Georgescu tha se kërkimet kishin për qëllim bllokimin e kandidimit të tij për presidencën.
Votimi i nëntorit u anulua
Rumania u zhyt në kaos politik në fund të vitit të kaluar, kur partia e ekstremit të djathtë pro-rus dhe anti-NAto Georgescu, fitoi raundin e parë të zgjedhjeve presidenciale dhe duhej të përballej me reformisten Elena Lasconi në balotazh. Gjykata Kushtetuese, në vend të kësaj, anuloi votimin, pas një operacioni të dyshuar rus për të ndikuar në rezultat. Zgjedhjet e reja janë caktuar për 4 maj, ndërsa balotazhi pritet dy javë më vonë, më 18 të të njëjtit muaj.
Ndërkaq, Elon Musk e ka mbrojtur atë: “Arrestim i gabuar”
Në mbrojtje të Georgescut është Elon Musk, i cili deklaroi në X: “Ata arrestuan një person që mori numrin më të madh të votave në zgjedhjet presidenciale rumune dhe kjo është e gabuar.”
“Lega” në BE: “E gjithë kjo është shqetësuese”
“Lega” italiane foli gjithashtu në Dhomën Evropiane, duke thënë se ishte “e shqetësuar” për atë që po ndodhte në Rumani. “Së pari anulimi i zgjedhjeve sepse rezultati nuk u vlerësua nga Brukseli. Tani arrestimi i Georgescut, kandidatit të preferuar për presidencën. Ajo që po ndodh në Rumani, një vend anëtar i BE-së, është jashtëzakonisht shqetësuese”, theksoi delegacioni në Dhomën Evropiane të Lidhjes në X, duke komentuar arrestimin.
