Teksa Anglia nis të hënën vaksinimin masiv të popullsisë, kurse Rusia e ka nisur sot, ndërkohë që Italia ka planifikuar deri në mes të janarit, vaksinimin e 1.7 milion italianëve, kryeministri Rama ka njoftuar në tuiterin e tij, se është rrugës për në Amerikë, për të biseduar me prodhuesit e vaksinës.
Sigurimi i vaksinës sa më parë, është një prioritet i luftës sonë, kundër Armikut të padukshëm, dhe s’do lëmë gurë pa luajtur, derisa vaksina të fillojë të vijë sa më parë në Shqipëri! Kontakti sy më sy me prodhuesit e vaksinës, i shërben këtij qëllimi.
Rrugës për në Shtetet e Bashkuara! ka shkruar ai.
Nuk dihet ende se kë do takojë konkretisht kryeministri në Amerikë për të biseduar dhe a do jenë të interesuar prodhuesit e saj për një treg si Shqipëria. Ajo që dihet, është se jo më larg se dje, Biden-i, presidenti që pritet të ngjitet në karrigen e presidentit të Amerikës, ka deklaruar se gjëja e parë që do t’u kërkojë shtetasve amerikanë, është mbajtja e maskës për 100 ditë.
