Jemi në verë, plotësisht në verë. Provimet e testimet kanë mbaru. Shkollat janë ndalë. Ju ka dhënë shkolla detyra gjatë pushimeve? Them se kush e ka bërë, nuk ka bërë mirë. Unë nuk do t’ju kisha dhënë. Unë vetë si prind i kam këshillu tre fmijt e mi të mos i bëjnë. Ka një kohë me pushu nga detyrimet, që të jemi gati e madje me padurim për kur, në vjeshtë, të nisë koha e detyrimeve. Vera është kohë e dlirjes, është koha me pushu.
Vera është koha me ndejtë gjallnisht me shoqninë (e jo veç shoqninë e detyrimtë të shkollës, po edhe e sidomos me ato e ara që zgjidhni ju vetë).
Vera është koha me ndejtë gjallnisht me familjen, me prindt, me jua plotësu sho-shoqit të përditshmen, prindi fmisë e fmija prindit, çka jashtë verës nuk e bëni dot shpengueshëm
Vera ëshrë koha me ndejtë me gjyshat, me fisin e me kushërinjtë e me shoqnitë e kushërinjve. Me ndejtë edhe e sidomos me ata kushërinj që mërgimi jua ka largu sysh e zemre, dhe jua afron veç vera. Ata kanë mall për ju e ju keni mosnjohje për ta. Shkēmbeni gjuhë me ta, shkëmbeni njohje, shkëmbeni ndjesi, shkëmbeni me të gjithë! Thyejeni njerëzisht botën virtuale!
Vera është koha me njoftë vendin: me ja njoftë të folmet, tryezat e bukës e tryezat e bisedës, lumejt e detet e gjithë bekimet e natyrës po edhe dhunimet e dorës së njeriut t’panatyrshëm. Njfjani vendit dashnitë dhe dhimbjet, veç përmes njoftjes mundeni me u dashtë kët vend që meriton me e dashtë si çdo atdhe.
Vera është koha me lexu pa detyrë por për “qejfyrë”, siç i thoja unë fmijve t mi gjatë verës: “tash kalamaj lexojmë për qejfyrë. Detyrë n’stinët e tjera! Qejfyrë n’verë”.
Lexoni ç’të mundeni, art e mendim. Lexoni atë që s’ju del ngeja ta lexoni në stinët e tjera. Lexoni në daçi edhe të njëjtin lajm nëpër portale a gazeta online, se kështu do ta kuptoni si jua ofron njera e si ua ofron tjetra. Do të kuptoni marifetet e pseudodemokracisë dhe do zhvilloni mendimin kritik! Ehhhh ky vend ka kaq shumë nevojë për mendimin kritik.
Dhe së fundi, vera është koha me ndejtë me veten. Lirisht, plotësisht, pa detyra e pa ndërmjetësa. Me e dashtë veten, me e drashtë veten, me e njoftë veten. Veten tuaj dhe veten e sekujt pranë jush a mes jush.
Ku hyjnë detyrat në gjithë sa ju shkrova?! Pse duhet me qenë vera apendiks i shkollës? Rrezikojmë kësisoj që edhe shkolla me qenë apendiks i verës. Mos u besoni atyre që ju thonë se çmësoheni me regjimin shkollor po qe se nuk bëni detyra në verë. Pallavra janë! Vera s’ka nevojë për regjim, ka nevojë për njoftje dhe njoftja kryhet në shlirim nga skemat.
Shlirohuni këtë verë! Ju përqaf të gjithëve!
Ledi
