I ardhur në Tiranë përpara pak ditësh, java e shkrimtarit të njohur europian nga Vendet e Ulëta, Jan Brokken, autor i shumë titujve, përkthyer në mbi 20 gjuhë, mbi të cilët janë bazuar edhe një sërë skenare filmash, ka qenë e mbushur me takime të shumta, në njërin prej të cilëve, atë zhvilluar ditën e djeshme, pranë Qendrës Kombëtare të Librit dhe Leximit në Tiranë, deklaroi edhe se tanimë që e njohu Shqipërinë dhe të shkuarën e saj komuniste, do të shkruajë me patjetër dicka edhe për të.
I pyetur prej MetropolPostit se cila do të qe natyra e këtij libri, a do të ishte ai mirëfilli historik apo një histori e trilluar, autori Jan Brokken, u shpreh se nuk kishte ndërmend ta zbulonte atë që do të shkruante, por se do të ishte në natyrën e librit të tij “Shpirti Balltik”.
Një autor nuk duhet ta tregojë kurrë se çfarë po shkruan, se sjell ters, u shpreh fillimisht me shaka Jan Brokken. Do të jetë si “Shpirti Balltik”, me një aspekt historik, me një aspekt historie personale. Siç përpiqem në të gjithë librat e mi, do të ketë një bazë historike, sigurisht janë të rëndësishme faktet, por kryesorja është se si njerëzit i kanë jetuar këto fakte. Pra dhe ajo që mendoj më shpesh, ajo që më shqetëson më shpesh, është mjedisi ku është rritur, cfarë ka ndikuar më shumë, si ka ndikuar ky mjedis tek jeta e tij, si e ka perceptuar ai, tha mes të tjera shkrimtari Jan Broken i pyetur prej MetropolPost mbi bërthamën e asaj që do ta identifikonte këtë libër mbi Shqipërinë.
Aktualisht Jan Brokken ka ardhur në shqip me dy nga titujt e tij më të pëlqyer, “Shpirti Balltik” dhe “Pianisti”, publikuar prej Shtëpisë Botuese “Dituria”, e cila mundësoi edhe ardhjen e autorit në Tiranë.
