Thuajse tri ditë pa ujë! Ky është kalvari i zonave turistike sidmos të zonave të Hammallasit e Lalëzit, por edhe i fshatërave përreth, të cilët janë vazhdimisht nën presionin e mospasjes ujë për ditë të tëra, për hir të ujësjellësit të Fushëkuqes.
Edhe pse kjo problematikë është e njohur, sërisht nuk shihet të merren masa në mënyrë që kjo problematikë të gjejë zgjidhje.
Ujësjellësi i Fushëkuqes është ndërtuar më 1982-in dhe furnizon aktualisht një pjesë të mirë të fshatrave përreth Durrësit e Kavajës. Edhe pse duket se ka rezistuar deri më tani, me gjasa, autoritetet vendore e lokale duhet të marrin masa për zëvendësimin ose rregullimin përfundimtar të tij, duke u kursyer kështu turistëve dhe banorëve një siklet tejet të madh, atë të mos pasjes ujë për ditë të tëra.
Aktualisht, banorët e zonave që varen prej këtij ujësjellësi, kanë që të premten e deri më sot, që nuk furnizohen me ujë të pijshëm, pa u njoftuar me asnjë lloj mënyre as për ndërprerjen e ujit, e as për kohën e nevojshme për riparimin e difektit, në mënyrë që të marrin masat e nevojshme.
