Një gropë e stërmadhe në afërsi të një miniere bakri në Kil, ka habitur specialistët që po hetojnë aktualisht mbi të për të kuptuar më tepër, se nga se ka ndodhur, e se cfarë fsheh brenda.
Gropa e cila ka një diametër prej 25 metrash dhe një thellësi rreth 200 metrash, gjendet në territorin e minierës së Alkaparosës, pranë Tiera Amarillës, rreth 664 km në veri të kryeqytetit Santiago.
Për momentin në të po kryhen analiza teknike, për të përcaktuar shkaqet e fenomenit, e për të kuptuar nëse formacioni ka lidhje në ndonjë farë mënyre me aktivitetin minieral.
Drejtuesi i Sernagemin, entit kilen që merret me gjeologji dhe aktivitetin e nxjerrjes së mineraleve, David Montenegro, u shpreh se agjencia e tij ishte njoftuar të shtunën për gropën e stërmadhe, duke urdhëruar menjëherë mbylljen e zonës, për të shmangur ndonjë fatkeqësi të mundshme.
Nga hetimet e deri më tanishme, nga sa raportohet, gropa ka mbetur e pandryshueshme.
