Teksa në Ohër është mbajtur sot takimi i radhës mbi Ballkanin e Hapur, kreu i qeverisë Rama i ka cilësuar si peshq të gjithë ata që besonin tek deklaratat e Ministrit të Jashtëm Rus, se Ballkani i Hapur ishte një nismë e Rusisë.
Tani sa për ministrin e Jashtëm rus, bëhet fjakë për një peshkaqen shumë të madh në nivelin e lartë të diplomacisë botërore, tha Rama, i cili është I mirënjohur për sarkazmat e tij, dhe shumë peshq kanë rënë në atë rrjetën e trukeve të tij, sepse nëse ai do të ishte mbështetësi i Ballkanit të Hapur, do të ishte këtu. Si mund të jetë ai mbështetësi i Ballakanit të Hapur. SHBA dhe BE nuk e duan Ballkanin e Hapur, por SHBA dhe BE janë këtu sot, por ai nuk është. Tani këtë lloj fabule ose këtë lloj narrative, ose këtë lloj ushqimi, e hanë vetëm peshqit e Ballkanit të mbyllur. Peshqëve të Ballkanit të mbyllur nuk kemi çfarë t’ju bëjmë. Dhe përpara të flasë ai që e di të saktë, nëse është Rusia që e ka sajuar të gjithën këtë, dua të them vetëm këtë: Të peshkosh në këtë ujin e historisë, në këtë marrëdhënie ballkanike, për të dëmtuar procese që janë në thyerje me të shkuarën dhe që janë në ngjitje me të ardhmen, është shumë e kollajshme, por nuk ka për të funksionuar, tha Rama, sipas së cilit e vetmja diferencë mes Ballkanit të Hapur dhe marrëveshjeve të tregut të përbashkët, ishte vendosja e vetove që ky i fundit mundësonte. E kemi parë se si ka funksionuar puna me atë tregun e përbashkët, tha Rama, për të cilin të gjithë flasin që është gjëja e duhur. Është gjëja e duhur, po, por ne Ballkanin e Hapur e kemi krijuar për të zbatuar ato që janë aty tek parimet e tregut të përbashkët. Dhe ndryshimi cili është? Aty tek tregu i përbashkët mund të vihet veto. Dhe njëri vë veto dhe të gjithë rrinë pa kanale të gjelbra të operatorëve ekonomikë, tjetri vë veto, s’ka diploma të njehësuara. Kjo është.
Rama ftoi shqiptarët të përqafonin nismën e Ballkanit të Hapur, për të shkruar në këtë mënyrë, sic edhe u shpreh ai: “historinë e re mes vendeve të Ballkanit”
Ne nuk kemi pritur Ballkanin e Hapur, apo nuk na ka penguar Ballkani i mbyllur, për ta mësuar që ka një histori dhe as na ka penguar e as na pengon kjo histori, përkundrazi, ne duhet të vazhdojmë këtë rrugë që të ndërtojmë një histori të re, si të gjithë popujt e vendet që kanë ditur të ikin nga kthetrat e të shkuarës dhe ja ku janë sot. Dhe po e mbyll me fjalët e ambasadorit në Beograd që I tha mbrëmë në darkë. Dy bomba atomike ka hedhur Amerika mbi Japoninë dhe Amerika dhe Japonia janë aleatë shumë të ngushtë prej shumë kohësh. Nëse Japonia do kishte qendruar me kurriz, nuk do ishte kjo gjë. E kaluara ka shumë gjëra që na pengojnë, por edhe shumë që duhet të adresojmë, por sa më shumë që të jemi së bashku për të ardhmen, aq më e mundur bëhet që edhe problemet e të kaluarës t’I shohim me të njëjtin sy. Nëse nuk kuptpojmë këtë dhe nëse nuk kuptojmë se ne vijmë nga shumë histori të ndryshme dhe po I hymë cdo takimi me syrin ga vjen ti e nga vij unë, ne nuk bëhemi kurrë bashkë. Për mua e rëndësishme është që eksportet e bujqëve shqiptarë në Serbi dhe Maqedoni, ku ata eksportonin edhe më përpara, janë dyfishuar, tha Rama.
