Drusilla Foer është një prej personazheve më të diskutuara aktualisht në botën e show biz-it Italian. Një zonjë në moshë, me një dukje tejet elegante prej aristokrateje, me një karrierë të pasur, si biografe, këngëtare, artiste e balerinë, Drusilla jo vetëm që ka tërhequr vëmendjen me elegancën e saj në vjeshje e komunikim, po shndërrohet edhe një prej personazheve më të dashura për italianët.
Por kush është në fakt kjo grua, që mbart emrin Drusilla Foer?
Drusilla Foer, është një personazh artistik, që me gjasa e ka kapëcyer famën e krijuesit të saj. Ajo, siç e cileson edhe vetë artisti italian që e ka krijuar, Gianluca Gori, është alter egoja e tij veshursi grua aristokrate nga Firence, e cila ka rrojtur një jetë të pasur, plot me ndodhi.
Vetë Gianluca ka nisur ta bëjë të njohur si personazh Drusilla-n përmes videove në internet. “Doja t’i jepja zë botës së saj të brendshme, tejet të clirët e të lirë: pastaj qe aq e zonja, saqë mendova se të tërë duhej ta njihnin”, shprehet ai për personazhin e tij tashmë më të famshëm se vetë ai, e tejet të pëlqyer prej italianëve.
Ndërkaq, vetë Drusilla, thotë se Gianluca është thjesht një tip me të cilin ka pirë një çaj dikur. “Thotë se më ka shpikur ai, por unë nuk besoj se është kaq gjenial”, sqaron ajo, për publikun e gjerë, duke na ndërmendur filmin Simone, me aktorin e famshëm Al Pacino në rolin e regjisorit në film, dhe personazhin e krijuar prej tij, Simonen.
