Pas deklaratave dhënë ditën e sotme nga Elbasani, Shijaku, Vora, Fieri, Tirana, ku ka theksuar më së shumti ftesën për të marrë pjesë sa më shumë në zgjedhje, në deklaratën e tij nga Vlora, Presidenti Meta ka theksuar, veç ftesës drejtuar vlonjatëve që të dalin të votojnë, edhe mesazhin se më e rëndësishme se sa thjesht rezultati i fitores së një partie, qe dëshmimi i bashkëjetesës demokratike në vend.
I ftoj qytetarët të votojnë e të mos harrojnë se sa qytetarë janë martirizuar që ne të votojmë. I ftoj të gjithë të shkojnë me qetësi drejt qendrave të votimit, të votojnë atë që ata besojnë se është alternativa më e mirë për të ardhmen, mbi të gjitha të shkojmë në mënyrë qytetare dhe të tregojmë që për ne më e rëndësishme është bashkëjetesa demokratike, se sa thjesht rezultati i një alternative politike, sepse në fund të gjithë procesit, duhet të fitojë me patjetër Shqipëria. Mos të harrojmë që jo vetëm gjithë Evropa i ka sytë tek ne, sepse standardi i zgjedhjeve është kusht i panegociueshëm për t’u bërë pjesë e saj, por edhe shqiptarët në rajon e në botë i kanë sytë tek ne, dhe unë besoj sot se do bëjmë të gjitha përpjekjet, që të mos zhgënjejmë, dhe të nisim një epokë të re në Shqipëri, atë të shenjtërimit të votës.
Kujtojmë që vetëm pak ditë përpara zgjedhjeve, kreu i Shtetit ka bërë apele të fuqishme për mbrojtjen e votë, mes së cilëve ai që ngjalli më tepër reagime, qe ai i rrëmbimit të cfurqeve kundër krimeve elektorale.
