Një krim i rëndë ka tronditur sërisht ditën e sotme shoqërinë shqiptare. 25 vjeçarja Sabrina Bendaj, nga fshati Zhupan i Fierit, nënë e një vajzeje të mitur, është vrarë prej ish-bashkëshortit mbrëmjen e djeshme, teksa hante bukë pasi qe kthyer nga puna.
Sipas gazetares Laureta Roshi, ish bashkëshorti i saj, Elton Metaj 31 vjeç, i cili është ndaluar ndërkohë nga policia, i kishte shkuar edhe një vit më parë në oborr të shtëpisë, duke tentuar vetëvrasjen si presion që ajo t’i jepte vajzën e të kthehej me të, ndërkohë që i vëllai i të gjorës, ka rrëyer pas ngjarjes së rëndë, se e motra kishte vdekur prej një plumbi në mushkri.
Nga njoftimi i Policisë së Shtetit
Pas marrjes së njoftimit se në fshatin Zhupan, në banesën e ish-vjehrrit, shtetasi Elton Metaj ka vrarë me armë zjarri ish-bashkëshorten e tij, shtetasen S. B., menjëherë në vendngjarje shkuan shërbimet e Policisë dhe organizuan punën për kapjen e autorit i cili ishte larguar nga vendngjarja me një motomjet.
Pas 3 orësh ndjekje, nga strukturat e DVP Fier, Forca Operacionale, Forca e Posacme “Shqiponja”, shërbimet e Komisariatit të Policisë Fier në bashkëpunim dhe me 2 grupe të FNSH Fier, falë veprimeve të shpejta, të mirëorganizuara dhe profesionale, u bë i mundur lokalizimi dhe kapja e autorit në një zonë të pyllëzuar të fshatit Peshtan, bashkë me armën e krimit automatik dhe motomjetin me të cilin u largua nga vendngjarja të cilat u sekuestrua në cilësinë e provës materiale.
Në vijim të veprimeve, specialistët për Hetimin e Krimeve në Komisariatin e Policisë Fier, arrestuan në flagrancë për veprën penale “Vrasja për shkak të marrëdhënieve familjare” shtetasin Elton Metaj, 31 vjeç, banues në Peshtan( i dënuar më parë për veprat penale “Armëmbajtja pa leje” , “Kundërshtim i punonjësit të policisë” dhe “Dhunë në familje” .
