Presidenti rus Vladimir Putin nuk do të jetë i ftuar në funeralin e Mbretëreshës Elizabeth II, për shkak të pushtimit të tij në Ukrainë, ka deklaruar një burim i lartë i qeverisë britanike ditën e djeshme për CNN.
Sipas këtij burimi, lista e plotë e ftesave nuk është finalizuar ende, por prej saj ishin përjashtuar zyrtarët e tri vendeve: ata nga Rusia, Bjellorusia dhe Mianmari. Sa i takon Rusisë dhe Bjellorusisë, motiv për përjashtimin e tyre ishte pushtimi i Ukrainës prej Putinit, të cilin Bjellorusia e ka mbështetur, kurse në rastin e Mianmarit, për hir të trajtimit të popullit Rohingya.
Pallati Mbretëror i dërgon ftesat për funeralet shtetërore me këshillën e qeverisë, pasi anëtarët e shërbimeve civile dhe diplomatike shqyrtojnë implikimet politike të ftesës së liderëve të caktuar.
Zakonisht, çdo vend me të cilin Mbretëria e Bashkuar ka një marrëdhënie normale diplomatike, ftohet në funeralin shtetëror, siç është ai që do të mbahet për mbretëreshën Elizabetë në Londër këtë të hënë që vjen. Kombet zakonisht përfaqësohen nga udhëheqësi i tyre politik, kreu i shtetit, një anëtar i lartë i qeverisë ose ambasadori i tyre në Mbretërinë e Bashkuar. Sipas një tjetër burimi, në funeralin shtetëror të Elizabetës II do të marrin pjesë deri në 500 personalitete të huaja.
Deri më tani, Britania e Madhe ka qenë një nga kundërshtaret më të forta të luftës së Rusisë ndaj Ukrainës, dhe një nga mbështetësit më të mëdhenj të kësaj të fundit, duke ofruar para, armë dhe ndihma.
Mbretëria e Bashkuar ka sanksionuar gjithashtu një sërë zyrtarësh ushtarakë dhe biznesesh në Mianmar, për atë që e ajo e ka cilësuar si spastrim etnik të Rohingyave, një grup kryesisht mysliman në shtetin me shumicë budiste të vendit, i cili ka vuajtur dekada të persekutimit. Në fillim të këtij muaji, junta qeverisëse e Mianmarit, dënoi ish-ambasadorin e Mbretërisë së Bashkuar në vend, me një vit burg për problematikat e emigracionit.
