Pas vite luftimesh për barazi gjinore në punë dhe në jetën familjare, një trend i ri është popullarizuar mes vajzave të reja: ai i vajzave të buta.
I lindur si një mikro-trend në rrjetet sociale në vitin 2010, fenomeni duket se po bëhet bartës i një revolucioni të vërtetë, duke ngjallur edhe debate të forta.
Vajzat që i përkasin Gjeneratës Z (lindur midis 1995-s dhe 2010-s), janë duke kërkuar një jetë më të kënaqshme, që nuk lidhet dhe aq me suksesin profesional, por fokusohet kryesisht në mirëqenien fizike dhe mendore. Ato nuk pëlqejnë të jenë “shefe”, por “të buta”, dhe kanë si synim të rrojnë një jetë me ritme më të ngadalta, krijuar për të shmangur lodhjen e sistemit nervor, i përhapur në brezin para tyre.
RASTI SUEDEZ / Falë rrjeteve sociale, ky fenomen është përhapur me shpejtësi në mbarë botën, duke shkaktuar shumë diskutime sidomos në Suedi, të cilat e marrin shtysën nga rasti i një njëzet e pesë vjeçareje, Vilma Larsson, e cila një vit më parë vendosi të shndërrohej në shtëpiake: “Nuk kam qenë kurrë kaq e lumtur”, tha ajo pasi kishte punuar në një supermarket, në një shtëpi pleqsh dhe në një fabrikë.
I dashuri i saj punon nga distanca në industrinë e financave, dhe teksa ai i kalon ditët në laptop, ajo ndodhet në palestër, duke pirë një kafe ose duke gatuar. Ajo e ndan stilin e jetesës në Instagram, YouTube dhe TikTok, ku ka grumbulluar 11,000 ndjekës dhe përdor hashtags “hemmaflickvän” dhe “hemmafru” (term suedez që do të thotë “e dashura shtëpiake” apo “zonjë shtëpiake”), duke e përshkruar veten si një “vajzë e butë”, e duke përqafuar një mënyrë jetese më të butë, më femërore, sesa duke u fokusuar në karrierën e saj.
Por në Suedi, ku ka vite qw luftohet për promovimin e gruas në karrierë, popullariteti i konceptit ka shkaktuar debate dhe grupime.
Sipas sondazheve, kjo prirje po bëhet edhe prirje mes të rinjëve, ku 14% e vajzave të moshës 7 deri në 14 vjeç, po identifikohen si vajza “të buta”.
Nga sa referojnë mediat vendase, nuk ka të dhëna zyrtare për numrin e “vajzave të buta” të reja që kanë lënë punën fare dhe jetojnë me partnerët e tyre si Vilma Larsson”, por fenomeni është bërë megjithatë një temë kryesore e diskutimit në Suedi. Mes debatuesëve, ka nga ata që mendojnë se vajzat më të reja nuk janë të vetëdijshme se sa shumë gratë e gjeneratave të mëparshme kanë luftuarpër barazi dhe të drejta, kurse nga ana tjetër, ka që e mirëpresin këtë prirje, duke vënë në qendër mirëqenien e individit: jo të gjithë – thonë ata – janë të destinuar të bëjnë karrierë dhe është e drejtë të jesh të zgjedhësh për jetën që do të bësh.
