Italia ka zhvilluar ditën e djeshme zgjedhjet e përgjithshme, të cilat në rezultatet paraprake kanë nxjerrë fituese të djathtën italiane, prirë prej partisë politike “Fratelli d’Italia”, në koalicion me të tjera parti të të së djathtës, “Lega”, “Noi Moderati”, përfshi edhe “Forca Italia” të Berluskonit, i cili rikthehet tashmë sërish në parlamentin italian në moshën 85 vjeçare.
Por kush është Giorgia Meloni, kryetarja e partisë “Fratelli d’Italia”, e cila do të marrë në fakt edhe fatet e Italisë në dorë pas votimeve të djeshme, pasi partia e saj ka fituar përqindjen më të madhe të votave, 26.10%?
Nga sa sjellin mediat italiane për gruan që do të kryesojë Italinë, teksa citojnë biografinë e shkruar prej vetë Melonit “Io sono Giorgia”, kryeministrja e ardhshme e Italisë është rritur pa baba.
“Iku nga shtëpia kur unë isha një vjeç”, shkruan Meloni në biografinl e saj.”Jetonte në Kanarie dhe ne shkonim tek ai një javë a dy e shumta. Ime më ka vuajtur shumë për të na rritur. Dhe asaj ia detyroj të gjitha. Gjykimi i saj është një prej të paktëve që u druhem më tepër. Në moshën njëmbëdhjetë vjeçare ai më bëri një bisedë që nuk i duhej bërë një vajze, dhe unë i thashë “Nuk dua të të shoh më!” Dhe kur vdiq, nuk ndjeva asgjë, zëre se ishte një i panjohur”.
Ka qenë pikërisht kjo tronditje, rrëfen Meloni më tej në biografinë e saj, e cila e shndërroi atë më pas në një vajzë të guximshme, kërkuese, luftarake dhe moskokëçarëse, karakter ky që me sa duket i siguroi edhe vendin si kryeministre e Italisë në zgjedhjet e djeshme.
Nga sa sjellin mediat italiane, Meloni flet rrjedhshëm anglisht, frëngjisht dhe spanjisht, por nuk ka mbaruar studimet e larta. “Tallen se jam pa të lartën”, shprehet ajo. “Nuk kisha mundësi ta vazhdojan. Punoja për të mbajtur veten. Studioja, bëjë politikë që atëherë, shumë gjëra. Në Itali vetëm 17 % e njerëve janë diplomuar, shumë më shumë duhet të jenë, vetëm se jo të tërë e kanë mundësinë të rrinë aty e të bëjnë 8 deri në 10 vite univeristet, duke shkuar nëpër manifestimet e të tjerëve, se u duhet të punojnë”.
Meloni ka lindur në Romë në 15 janar 1977. Ka nisur të merret me politikë qysh adoleshente dhe që në moshën 19 vjeçare ka qenë përgjegjëse e lëvizjes studentore të së sapolindurës parit të Gianfranco Finit “Alleanza Nazionale”.
Në Parlament hyn në 2006-n, në moshën 29 vjeçare. Më pas, në 2008, gjatë qeverisjes së tij të fundit Berluskoni e vë si ministre të Rinisë, periudhë që përfundon në 2011-n, me ardhjen e qeverisë teknike Monti. Në 2013-n bëhet sërish pjesë e Dhomës së Deputetëve.
Në zgjedhjet e 2018, partia e saj “Fratelli d’Italia” arriti të merrte 4% të votave, pas dy partive të tjera të djathta “Lega” dhe “Forca Italia”.
