Studiuesja e gjuhës shqipe Ledi Shamku Shkreli ka bërë publik e ditët e fundit një gafë të kryeakademikut Gjinushi, përgjatë Konferencës Jubilare të 50-vjetorit të Kongresit të Drejtshkrimit.
Në fjalën e tij përgjatë kësaj konference, kreu i Akademisë së Shkencave Skënder Gjinushi, citon edhe një autor e libër që sipas Shamku-Shkrelit ështi i sajuar për efekte sarkazme, përmendur në një shkrim që përpiqet të godasë kontrollin e shtetit mbi gjuhën.
“Mezi e prita këtë ditën e Festimeve Drejtshkrimore të Akademizmës sot”, shkruan Shamku-Shkreli në shënimin e saj. “U ngrita herët, vajta në leksion, u shpjegova studentëve gjuhën si identitet, por mendjen e kisha te Festimet në Tiranë. Kisha hall mos humbisja fjalimin e Kryeakademikut dhe e dija që nuk do të më zhgënjente në banalitetin e tij siç, rrofsh o Zot, nuk më ka zhgënjyer kurrë. Por sot në fjalimin e tij Kryeakademiku kishte vendosur të më bënte të lumtur, sepse u shfaq si Kryekomiku i Pirandellos te Gjashtë Personazhe në kërkim të Autorit. Ja njëlloj edhe fjalimi solemn i Kryeakademikut Gjinushi po kërkonte Autorin, dhe e gjeti! Jua kam vënë enkas përbri edhe një copë nga fjalimi i Kryekomikoakademikut, edhe burimin origjinal nga ky njeri e ka vjedhur ose plagjiaturuar fjalimin e tij solemn për Festimet Drejtshkrimore. Artilulli nga e ka vjedhur, është në fakt një shkrim sarkazmë te Peisazhe të Fjalës, që mban për autor pseudonimin Gjeto Bashari. (bashkëngjitur edhe linkun e plotë të artikullit sarkazëm që ta lexoni me nge). Ajo çka dua t’ju them është se nuk ekziston asnjë libër “shteti dhe drejtshkrimi” me autor caruana të cilin e citon (ngatërrueshëm madje) kryeakademiku në fjalimin e tij sot. Libri “Shteti dhe Drejtshkrimi” është një sajesë e sarkazmës së Gjeto Basharit, i cili e sajon ekzistencën e ketij gja-libri thjesht e vetëm për t’u tallur me hiperkontollin e shtetit në punë të gjuhës, ja si kjo që kërkon të bëjë Shkencizma sërish. Por ama libri nga sot ekziston!!! Po po, libri “shteti dhe drejtshkrimi” nga sot ka jetën e vet si shenjë e hajnisë intelektuale të kryeakademikut gjinushi. Gjeto Bashari e sajoi thjesht si Sarkazëm. Kryeakademiku e plagjaturoi si Fjalimin e vet Solemn për Festimet Drejtshkrimore. Dhe kur sarkazmën e plagjiaturon ish-Ministri i Arsimit të Ramiz Alisë dhe njëherit Kryeakademiku i sotshëm, ajo s’është sarkazmë, është Kryesarkazmë!”, shkruan mes të tjerave Ledi Shamku Shkreli, duke i bashkëngjitur shënimit të saj edhe linkun e shkrimit nga është shkëputur ky autor e tekst, e po ashtu edhe videon e kryeakademikut Gjinushi.
Kujtojmë që kandidatura e kryeakademikut Gjinushi, siç e cilëson Shkreli, hasi në shumë kundërshtime kur u përfol aso kohe për të qenë të Akademisë së Shkencave, pas shkëputjes së tij nga politika e si drejtues i Partisë Social-Demokrate. Me gjasa, kaq vite më pas, intelektualët e vendit po ndërgjegjësohen se ai post, ka nevojë për një tjetër personalitet, që të përfaqësojë më denjësisht akademizmin në vend.
