Duket se pas shut down-it të e-albanias, i tërë sistemi onlajn qeveritar ka marrë rrokopujën. Pas Ministrisë së Jashtme e cila deklaroi se konsullatat shqiptare në botë nuk do të funksiononin për hir të rënies së sistemit onlajn, edhe Ministria e Punëve të Brendshme i fton qyetarët të paraqiten pranë sporteleve të saj për dokumentacionet që u nevojiten, duke bërë kështu një hap pas në arritjet e qeverisë e cila, mbylljen e sporteleve të administratës qeveritare, dhe marrjen e gjithë dojumentaci8nit në e-albania, e cilësoi një nga arritjet më të mëdha të mandatit të saj të tretë.
Ministria e Brendshme informon qytetarët se të gjitha shërbimet që janë ofruar online deri më sot, përkohësisht do të ofrohen #fizikisht pranë sporteleve përkatëse, që u përkasin gjithë institucioneve të varësisë, veçanërisht Policisë së Shtetit dhe Gjendjes Civile, shkruhet në njoftimin e Ministrisë së Brendshme.
Ky ndryshim i përkohshëm i praktikave vjen si rezultat i pamundësisë së ofrimit të shërbimeve online nëpërmjet platformës e-Albania, e cila si pjesë e infrastrukturës teknologjike shtetërore ka rënë pre e një sulmi kibernetik, të sofistikuar dhe të sinkronizuar jashtë Shqipërisë.
Deri në zgjidhjen e kësaj situate, qytetarëve do të vijohet t’u ofrohet shërbimi pranë sporteleve fizike të institucioneve të varësisë.
MB është në kontakt të vazhdueshëm me AKSHI-n dhe po punojnë intensivisht për normalizimin e kësaj situate të pazakontë dhe të panjohur më parë në këto përmasa.
Ministria e Brendshme kërkon mirëkuptimin e gjithë qytetarëve për vështirësitë e krijuara.
