Ashtu siç qe edhe paralajmëruar, ditën e djeshme në Elbasan janë firmosur 13 marrëveshje mes Shqipërisë dhe Kosovës, marrëveshje që në thelbin e tyrë synojnë të unifikojnë marrëdhënies mes dy vendeve, duke i dhënë udhë kështu, edhe pse pjesërisht, idesë së Shqipërisë së Madhe.
Në fjalën e tij me këtë rast, kreu i qeverisë Rama u shpreh se kjo qe gjëja më e natyrshme mes dy vendeve si Shqipëria e Kosova, por ja që rrethanat e sillnin të nevojshme të nënshkruheshin edhe marrëveshje për të këtilla gjëra.
Sot e sjellim bashkëpunimin më pranë njerëzve, tha Rama çojmë në një fazë tjetër lehtësimin e lëvizjes së lirë, të punësimit dhe ndërveprimin më të madh mes të dy bashkësive dhe dy anëve të kufirit. Më vjen mirë që sot angazhohemi për heqjen e lejeve të qëndrimit të përkohëshme, për hapjen e pikës kufitare të përbashkët në Shishtavec të Kukësit, si dhe për rregullimin e regjimit të trafikut lokal të kufirit. Marrëveshja që kemi sot para nesh, lehtëson proceduat për marrjen e një lejeje qëndrimi automatike, gjë që është e natyrshme, por u desh të uleshim e ta materializonim në një marrëveshje të përbashkët. Nga ana tjetër, krijohen kushte të favorshme për të dyja anët e kufirit, për aksesin në tregun e punës, si dhe krijimin e një hapësire të vetme, ku shqiptarët mund të punojnë, të krijojnë familje, të aksesojnë çdo shërbim dhe të dalin në pension, duke përfituar çdo kontribut dhe të mirë sociale, pavarësisht vendndodhjes gjeografike, në Shqipëri apo Kosovë. Njohja e sigurimeve shoqërore është një marrëveshje që është pjesë e së njëjtës paketë, e cila në tërësi do të thosha, jep një mesazh të plotë për garantimin e lirisë së zgjedhjes së çdo qytetari, të Shqipërisë apo të Kosovës, për tjetuar e punuar në çdo anë të kufirit e për të pasur një mobilitet të pakushtëzuar nga burokracia, përmes një marrëveshjeje të veçantë. Studentët e universiteteve tona do kenë mundësinë e njohjeve automatike, reciproke të diplomave. Shumë shpejt verifikimi i tyre do të kryhet në mënyrë elektronike, duke shpëtuar kështu nga burokracitë e shumta, tha Rama mes të tjerave në fjalën e tij, përpara nënshkrimit të marrëveshjeve.
