Zgjedhjet evropiane treguan një rritje të djathtës ekstreme në BE, edhe pse Partia Popullore Evropiane e qendrës së djathtë do të vijojë të mbajë shumicën e ulëseve në Parlamentin Evropian.
Nga 720 ulëset e Parlamenti Evropian, partitë e qendrës dhe socialistë vijojnë të mbajnë shumicën, edhe pse ekstremi i djathtë shënoi fitore të konsiderueshme, duke lëkundur shumë qeveri të vendeve të mëdha të BE-së, si Franca, e cila shpalli zgjedhjet e parakohshme, Gjermania, Spanja, Austria etj.
Fitorja e ekstremit të djathtë në Francë, çoi në vendin e presidentit Macron për zgjedhje të parakohshme në vend.
Në Gjermani goditjen më të rëndë e mori partia SPD e kancelarit Olaf Scholz, e cila u rendit e treta duke shënuar rezultatin më të keq ndonjëherë në zgjedhjet evropiane. Konservatorët e opozitës, CDU, shënuan 30% të votave dhe alternativa e ekstremit të djathtë për Gjermaninë (AfD) mori rreth 16% të votave.
Edhe në Spanjë Partia Popullore Konservatore (PP) mundi Partinë Socialiste të Punëtorëve të Kryeministrit Pedro Sánchez me 34.2% të votave, ndërsa partia e Sanchez u rendit e dyta me 30.2%. Partia Vox e ekstremit të djathtë mori 9.6% të votave.
Një tjetër vend ku e djathta ekstreme performoi fuqishëm ishte Austria, pasi Partia e Lirisë (FPÖ) fitoi me 25.5%. Partia Popullore konservatore është aktualisht në vendin e dytë, me 24,7% dhe Social Demokratët me 23,3%.
Në Itali, partia e kryeministres Meloni vijoi të qëndrojë në krye duke marrë 29% të votave dhe mposhtur Partinë Demokratike të qendrës së majtë me 5 pikë.
E djathta ekstreme nuk pati rritje të konsiderueshme në Çeki, Hungari, Finlandë dhe Poloni.
Grupi i Koalicionit Qytetar (KO) të kryeministrit polak Donald Tusk fitoi 37.06% të votave, përpara opozitës së djathtë Ligj dhe Drejtësi (PiS) me 36.16%. Partia Konfederata e ekstremit të djathtë doli e treta me 12,08%.
Në Hungari, partia Fidesz e Viktor Orban fitoi si zgjedhjet evropiane, por u shënua ngritja e një opozite të re, ajo e avokatit Peter Magyar, partia e të cilit Tisza zëvendësoi opozitën e vjetër.
Fidesz mori 44% dhe Tisza 30%. Tisza u krijua vetëm tre muaj më parë si një parti e re e qendrës së djathtë. Ata do të kenë 7 eurodeputetë dhe do të aplikojnë për t’u bashkuar me grupimin e Partisë Popullore Evropiane në Parlamentin Evropian.
Zgjedhjet për Parlamentin Evropian u mbajtën nga data 6 deri më 9 qershor në të 27 vendet e Bashkimit Evropian
