Pas marrjes së Kabulit prej talebanëve dhe mësymjen e tyre në godinën presidenciale, mijëra afganë kanë pushtuar rrugët dhe aeroportin e Kabulit, në përpjekje për t’u larguar nga vendi.
Sipas njoftimeve më të fundit nga mediat botërore, rreth 5 veta kanë humbur jetën në kaosin që ka pushtuar aeroportin, ndërkohë që shumica e ambasadave kanë lenë vendin, hiq rusët, të cilët kanë deklaruar se janë të gatshëm të bisedojnë me talebanët.
Ndërkaq, teksa Kanadaja është shprehur se do të presë rreth 20.000 refugjatë afganë, aktivistë, gra e fëmijë, mbështetës të SHBA-ve, Evropa duket e përçarë sa i takon pritjes së tyre.
Jo më larg se ditën e shtunë, ministri i Punëve të brendshme austriake Karl Nehammer, deklaroi se ‘Kush prej tyre ka nevojë për mbrojtje, duhet ta marrë atë sa më pranë vendit të origjinës’, duke i paraprirë kështu qëndrimit të gjashtë vendeve europiane, të cilat janë shprehur se do të kthejnë në vendlindje të gjithë refugjatët afganë, që nuk plotësojnë kriteret për azilantë. Edhe pse tri prej këtyre vendeve, Danimarka, Gjermania dhe Vendet e Ulëta, kanë ndryshuar qendrim, sërish kontineti plak nuk duket se do tregohet bujar me ta.
Jehonë në mediat botërore ka pasur edhe qëndrimi i Shqipërisë dhe Kosovës ndaj pritjes së refugjatëve afganë, të cilat i rendisin dy shtetet shqiptare ndër të parat që i janë përgjigjur pozitivisht kërkesës së administratës së Bidenit, drejtuar vendeve anëtare të NATO-s për strehimin e tyre.
Kujtojmë që jo më larg se sa dje, kreu i qeverisë Rama sqaroi se i qe përgjigjur pozitivisht kësaj kërkese, e po të njëjtin qendrim ka shprehur edhe Vjosa Osmani, presidentja e Kosovës, e cila ka deklaruar se i është përgjigjur pozitivisht kërkesës së sekretarit amerikan Blinken, për pritjen e refugjatëve afganë në Kosovë.
