Të gjithë ata që udhëtojnë në drejtim të destinacioneve të ndryshme nëpër botë, kanë tashmë mundësinë e një testi PCR në aeroportin e Tiranës, duke shmangur kështu problematikat e mundshme, që mund të vijonin për hir të mungesës së këtij testi, tashmë i detyrueshëm sa herë që udhëton jashtë.
Lajmin e ka bërë të ditur vetë Aeroporti Ndërkombëtar i Tiranës, i cili sqaron se për të bërë testin PCR Covid-19, duhen ndjekur hapat e mëposhtëme:
- vajtja në aeroport tre orë para fluturimit tuaj
- pritja për rezultatet e testit 90 minuta
Në faqen zyrtare të Aeroportit, thuhet se përgjigjja do të jepet në anglisht dhe se ky test, përkundër çmimit të kripur nëpër klinikat private, kushton 35 euro.
Po sipas njoftimit, ky shërbim do të ofrohet gjatë 24 orëve dhe testimi do të bëhet në Qendrën e Testimit që ndodhet jashtë zonës së Mbërritjeve.
Pasagjerët që kanë PCR nuk dërgohen në asnjë spital për procedurat, testet kryen në laboratorin e vendosur në Aeroportin Ndërkombëtar të Tiranës, saktëson njoftimi, i cili sqaron se “testi i antitrupave (testi i gjakut), i përdorur për të përcaktuar nëse pasagjerët kanë pasur infeksion më parë me koronavirus (COVID-19) dhe testi i Antigjenit, i përdorur për të përcaktuar nëse individi është ende i sëmurë, nuk mund të merret në këtë qendër”.
Nga sqarimet e dhëna për qytetarët që pyesin, kuptohet se testi nuk është i detyrueshëm të bëhet vetëm në aeroport, por kudo që pasagjeri dëshiron ta bëjë, mjaft ta ketë me vete, e se ai duhet me patjetër në anglisht.
