Ka ngjallur reagime të shumta projektligji për rritjen e pagës së administratës, deklaruar ditën e djeshme prej ministres së Ekonomisë Delina Ibrahimaj. Në fjalën e saj Ibrahimaj ka deklaruar se ky projektligj synon të bëjë një reformë të thellë në administratën publike, duke nisur së pari prej pagës së Presidentit.
“Ne sot nëpërmjet këtij projektligji synojmë të bëjmë realitet një rritje pagash të pamenduar deri disa vite më parë, duke e çuar pagën mesatare në administratën publike 900 euro në harkun të një viti, me dy hapa, hapi i parë tani që ka filluar dhe hapi tjetër gjatë vitit të ardhshëm“, tha Brahimaj mes të tjerave.
Sa u takon atyre që përfitojnë prej këtij projektligji, Ibrahimaj theksoi se “Presidenti i Republikës, titullarët dhe anëtarët me kohë të plotë të organeve kolegjiale drejtuese të institucioneve të pavarura kushtetuese dhe institucioneve të tjera të pavarura të krijuara me ligj. Praktikisht, përfitojnë 250 funksionarë politikë dhe funksionarë të tjerë, të cilët pagën e kanë të lidhur me pagën e Presidentit dhe efekti financiar vjetor shtesë vetëm për këto kategori përllogaritet 20 milionë lekë. Më konkretisht, paga e Presidentit propozohet të rritet në nivelin 425 mijë lekë të reja nga 257 mijë lekë që është aktualisht. Për sa i përket koeficientëve të pagës për pozicionet që kanë të bëjnë me institucionin e Kuvendit dhe atë të Ekzekutivit, ato janë përshtatur pa ndryshuar nivelin aktual të pagave, për ta rikonsideruar në një moment të dytë. Kjo për shkak se kemi pasur për qëllim të fokusuar fillimisht tek finalizimi i kësaj politike të re të rritjes së pagave për një kategori më të madhe përfituesish, sikurse janë të gjithë punonjësit e administratës publike qëndrore dhe vendore. Grupet e prekura in-direkt janë të gjithë punonjësit e administratës publike qendore dhe vendore. Politika e rritjes së pagave për administratën publike është parashikuar të shtrihet në dy vite. Sa i takon efektit financiar, kosto totale e kësaj politike, duke filluar nga 1 janar 2025, vit kur do të ketë një efekt të plotë projektligji dhe aktet nënligjore që e shoqërojnë atë është rreth 39 miliardë lekë, prej të cilave 1 miliard lekë llogaritet efekti financiar i zbatimit të vendimit të Gjykatës Kushtetuese për vitin 2023. Nga kjo reformë përfitojnë në total 130 330 punonjës“.
Por debat përgjatë parashtrimit të projekligjit, u bë lidhur me rritjen e rrogës së deptutetëve e ministrave, paga e të cilëve pritet të rritet në një moment të dytë. Deputeti Agron Shehaj, deklaroi se ndihej i lënë pas dore nga një qasje e tillë, duke pyetur madje edhe vetë Ibrahimajn, nëse ajo do të ishte e lumtur që punonjësja e saj do të merrte më shumë lekë se ajo, derisa të miratohej rritja e pagës edhe për deputetët e ministrat.
