Problemi është se dikush ka gjithë relaksin për të guxuar të ecë me 200 km/h në rrugë.
Unë s’e bëj dot. Edhe pse më pëlqen dhe mua shpejtësia, s’e bëj dot se s’ma mban kurrizi. S’e po më kapën, më fikën. Madje edhe kur më shkon ndonjëherë kilometrazhi te 120-a, direkt e ul, se vallahi me këto gjoba që të thyejnë në mes, e sidomos me 6 muaj heqje patente, s’ia dal dot.
Po si ia bën ky tjetri që ecën me 200?
Sepse ai s’ka frikë. Se dhe po e kapën, s’kanë çfarë t’i bëjnë. Babai i tij, që i ka blerë Audin apo Benzin 100 mijë Euro, apo dhe ai vetë, i ka aq kredite te pushteti apo te Partia, që mos t’ia marrin patentën, apo dhe po ia morën aty për aty, ta marri brenda ditës.
Prandaj këta që munden, ia bëjnë naftën shtetit mu në kokë sa herë që duan.
Se që ta kuptojmë, kur je 10-20 km mbi limitin e shpejtësisë, quhet që ke shkelur ligjin.
Kur je 100 km mbi limitin quhet që i ke bërë naftën ligjit mu në kokë.
Po të mos ishte kështu, do kishte dhe ai frikë si unë. Jo që s’do guxonte t’i bënte naftën shtetit, po as të tejkalonte shpejtësinë.. si unë.
Shqipëria jonë thjesht ndahet në ata që munden dhe ata që s’kanë
Ata që munden, ecin me 200 në orë, vjedhin parà publike, mbjellin e shesin drogë, pastrojnë parà pa teklif hiç, vjedhin prona, vendosin gjoba, çojnë femra jashtë, madje dhe vrasin pa e vrarë mendjen hiç.. Se e dinë që s’iu ndodh gjë.
Ata që s’kanë pastaj, ata paguajnë gjoba, s’marrin dot gjënë e tyre, iu kërcet xhepi sa herë që duan ndonjë shërbim, ecin poshtë limitit të tabelës, shkojnë në burg për lidhje të dritave, madje dhe vdesin se ata s’kanë as makina të mira, as mbrojtje speciale…
Kjo është Shqipëria. Dhe ne të gjithë e dimë, s’është diçka që e zbuluam sot.
Sot thjesht ishte një nga ditët ku përplasja mes dikujt që mundet dhe dikujt që s’ka, pati viktima.
Pse është kjo Shqipëria kur ata që s’kanë janë shumicë absolute përballë atyrë që munden, pse e kemi lënë këtë Shqipëri të katandiset në këtë derexhe dhe po e zhysim më thellë në katandinë e vet?
Kjo është pyetje shumë e thellë pastaj. Duhen netë dimri me gështenja.
