Një sërë fletëpalosjesh lëshuar së fundmi prej Seulit në Pyongyang, kanë demaskuar liderin korean Kim Jong Un. Të krijuar nga kundërshtarët e regjimit të Koresë së Veriut, ato denoncojnë luksin e shfrenuar të Kim Jongut, duke e krahasuar atë me varfërinë e popullsisë.
Orë, veshje stilistësh, çanta të modës më të fundit, shfaqen këtyre fletushkave, të cilat kanë ngjallur reagimin e popullsisë
Teksa populli i Koresë së Veriut shtrëngon rripat për shkak të krizës së vazhdueshme ekonomike, mbi të gjitha ushqimore, liderët e vendit, duke filluar nga familja Kim, gëzojnë mirëqenie dhe luks shumë përtej pritshmërive.
Fletëpalosjet e aktivistëve nga Jugu, të cilat mbërritën jo vetëm në zonat kufitare, por edhe në Phenian sipas akuzave të motrës së të liderit, Kim Yo-jong, japin një pamje tinëzare të pasurisë në të cilën jeton Kim Jong-un.
Fletushkat tregojnë liderin suprem që mban një orë luksoze zvicerane: një IWC Schaffhausen prej 13,400 dollarësh.
Edhe vajza e preferuar, Ju-ae, ndodhet në qendër të vëmendjes për xhaketën e saj prej lëkure Dior me vlerë disa mijëra dollarë, zbuluar tashmë nga inteligjenca e Seulit, bashkë me çantat me vlerë të ekspozuara nga Kim Yo-jong dhe ministri i Punëve të Jashtme Choe Son-hui, në samitin e shtatorit 2023 në Rusi, në takimin midis liderit suprem dhe shefit të Kremlinit Vladimir Putin.
Autorët e fletushkave, kryesisht koreano-veriorë që janë strehuar në Jug, i ekuivalentuan mallrat e luksit në kilogramë orizi dhe gruri, bazuar në pagat e pakta të Koresë së Veriut.
Aktualisht, Koreja e Veriut akuzon Seulin se ka dërguar drone në qiellin e Phenianit për të hedhur fletëpalosje me slogane, kundër qeverisë së Kim Jong-un, një goditje e mundshme për besimin absolut te Kim. Pa llogaritur dollarët amerikanë dhe USB-të plot me këngë të parezistueshme K-pop apo telenovelat shumë të kërkuara – pavarësisht rrezikut të dënimit me vdekje – telenovela të Koresë së Jugut.
