“Rritja ekonomike nuk përkthehet në rritje rrogash”- thote kryeministri, duke ju pergjigjur pyetjeve te qytetareve.
E thote si justifikim, ndërkohë që vetëm kaq duhet të ishte arsye shumë e fortë që shqiptarët ta pushonin nga puna kryeministrin. Nëse një kryeministër ne Europe do të guxonte ta thoshte këtë publikisht, karriera e tij politike do të kishte marrë fund menjëherë.
Por pse rritja ekonomike nuk përkthehet në rritje rrogash?
Eshtë e thjeshtë. Sepse qeveria ka hyrë në biznesin e shpërndarjes se rritjes. Qeveria përcaton fituesit dhe humbësit në treg. Me pak fjalë, qeveria ndan tortën e mireqeniës.
Kur qeveria jep nje koncesion ekskluziv, shpërndan një pjesë të rritjes ekonomike në mënyre të pamerituar tek koncesionari.
Kur administrata bën një tender korruptiv, çon një pjesë të rritjes në mënyrë të pamerituar tek fituesi i tenderit.
Kur shteti bën një ligj që favorizon një individ ose një grup të caktuar, e orienton rritjen ekonomike tek ata për të cilët bën ligjin.
Kur qeveria jep asete shumë të vlefshme publike me 1 euro te një oligark, e heq rritjen ekonomike nga qytetarët dhe ja çon oligarkut.
Kur ministria e Mbrojtjes tjeterson pronat e ushtrisë, kafshon rritjen ekonomike që duhej të shkonte tek qytetarët. Nëse edhe opozita e kyç gojen si në rastin konkret, atëherë sabotimi është bipartizan. Konsensual dhe me bazë të gjerë politike.
Kur entet rregullatore bëhen pale me kartelet, në vend që të mbrojnë konkurrencën, ateherë instalojnë ekonominë e rentës, që thith mirëqenien e qytetarëve për llogari të tregtareve të miellit, oligopoleve, monopoleve.
Pra me pak fjalë, qeveria dhe shteti kanë hyrë në biznesin e shperndarjes së rritjes ekonomike, për se mbrapshti. Qeveritë normale rishpërndajnë nga lart poshtë. Pra ja u marrin të pasurve dhe ja u çojnë të varfërve. Qeveria jonë bën të kundërtën.
Kjo eshte arsyeja se pse nuk rriten rrogat për qytetaret kur rritet ekonomia. Sepse qeveria nuk le tregun të bëjë punën e tij, por e shpërndan vete se ku duhet te shkoje rritja.
