Duket se ethet e 14 majit kanë përfshirë edhe Policinë Rrugore, e cila me sa duket ka nisur të sajojë ç’t’i vijë për mbarë, për të gjobitur qytetarët edhe kur nuk janë më shpejtësi e në orar pune, me idenë të kapë ç’të kapë.
Rasti i sapombërritur në redaksinë e MetropolPostit, është ai i një punëtori të acaruar, të cilit Policia Rrugore i kishte vënë gjobë 8 mijë lekë të reja, sipas denoncuesit pa të drejtë, e për më tepër duke e sajuar motivacionin.
Me ndalon policia, rrëfen qytetari. Në orar të punës. Po ngisja kamionçinën. Pse më ndaluat, i pyes. Po të nxjerr tym makina, më thonë. Nuk më nxjerr u them, është në rregull. Më kërkojnë letrat e makinës. I nxjerr. I shohin, në rregull. Aty syri u zë telefonin në sediljen e djathtë. Gjobë, ma kthejnë. Pse, u them? Se po flisje në telefon. Nuk po flisja! Me jepni faktin, me se më identifikuat? Me sy, ma kthejnë. Nuk kemi pajisje për të identifikuar nëse je duke folur në telefon apo jo. Vetëm për shpejtësinë ka pajisje. Me shpejtësi nuk ishe. 8 mijë lekë gjobë. Firmose!, rrëfen punonjësi i acaruar, teksa këmbëngul se nuk po fliste në telefon, e se për tjetër gjë e ndaluan por u shkoi huq, kur panë letrat në rregull, u hodhën nga telefoni, vetëm për të rrjepur para.
Mua atë gjobë do ma mbajnë nga rroga, vazhdon i mërzitur punonjësi. Punojmë tërë muajin e nuk na del, dhe gjobat me hile të policisë kemi mangut.
