Ka shkaktuar polemika mes mjekëve dhe opinionit publik, deklarata e mikrobiologut italian Andrea Crisanti, drejtor i Mikrobiologjisë në Universitetin e Padovas, i cili shprehet se vaksina e Pfizzer&BioNtech, që pritet të futet në Itali në mes të dhjetorit, nuk është ende e sigurt.
Mikrobiologu është shprehur se nuk ka ndërmend ta bëjë këtë vaksinë pa qenë më parë i sigurt për vlefshmërinë e saj. “Pra dua të jem i bindur përpara se ta bëj, e që të jem i bindur, më duhet të lexoj ndonjë material që të jetë i çertifikuar nga komuniteti shkencor, i cili është i vetmi garant për vlefshmwrinë e saj. Vlefshmërinë e vaksinës, s’mund ta vendosë një ndërmarrje e caktuar apo politika. Dhe ankohen pastaj, që njerëzit janë mosbesues“, është shprehur profesor Crisanti në mediat italiane.
Kjo deklaratë e mikrobiologut Crisanti, vjen pas deklaratës së komisar Domenico Arcuri-t, njeriut që merret me koordinimin e masave anti-covid nw Itali, i cili pak ditë më parë tha se deri në fund të janarit, do jetë gati vaksina për 1.7 milionë italianë, dhe se në fillim ajo do merret prej Pfizer&BionTech, e më pas prej kompanive të tjera, në varësi të rezultateve të arritura. Sipas Arkurit, vaksina e Pfizer&BioNtech nuk do jetë e detyrueshme, por nuk përjashtohet ndërkaq, edhe dhënia e ndonjë dokumenti imuniteti.
Kjo vaksinë parashikohet të bëhet në 2 doza, 21 ditë larg njëra-tjetrës, dhe mendohet t’i ofrohet në fillim personelit shëndetësor, grupeve me probleme shëndetësore, të moshuarëve e kështu me radhë.
