Një situatë e paprecedentë është bërë publike ditën e djeshme nga televizioni kombetar Top Channel, i cili në faqen e vet ueb, ka publikuar një shkrim ku akuzon për gjobëvënie kryeredaktorin e emisionit deri dje investigativ Top Story, duke deklaruar me bujë largimin e këtij të fundit.
Nga ana tjetër, ish kryeredaktori i Top Story-t, përmes një statusi të gjatë, e cilëson të turpshëm një shkrim të tillë, duke e akuzuar televizionin Top Channel dhe pronaren e tij Vjollca Hoxhën, për gjobvënie ndaj Samir Manes e po ashtu edhe për presion ndaj Kadastrës, për legalizimin e “Foliese” tek pedonalja.
Në shkrimin e tij ish kryeredaktori Endrit Habilaj, nuk le pa përmendur as gazetarin Sokol Balla, duke e akuzuar se po u vë gjobë ndërkaq fabrikave të vezëve.
Statusi i plotë i Endrit Habilajt
Një sqarim për publikun!
Ky shkrim është i turpshëm dhe që nuk i bën nder jo Top Channel, por askujt.
Tani le të marrim me radhë disa fakte:
- E para, unë kam dhënë dorëheqjen në 28 shkurt 2022. Nga ajo ditë, nuk kam patur fare akses për emisionin Top Story.
- E dyta, emisioni “Oligarkët e Rilindjes Urbane”, është realizuar nga Esmeralda Keta, fituese e dy çmimeve të BE. Tema është realizuar fare pa ndërhyrjen time. Dhe kjo mund të provohet lehtësisht duke kontaktuar Esmeraldën. Emisioni është anulluar dje, në 30 Mars 2022.
- E treta, emisioni i Rilindjes Urbane, ishte raportuar tek Bashkimi Europian, një projekt që e fitoi nëpërmjet aplikimit tim dhe FES. Unë sot e kësaj dite, këtë temë nuk e kam parë.
- E katërta, një pyetje për Vjollca Hoxhën, a ke vënë gjobë ti ndaj Samir Manes, duke anulluar emisionin “Kadastra e Vlorës”?!
- E pesta, një pyetje për Sokol Ballën, a po i vë gjobë fabrikave të prodhimit të vezëve dhe çfarë gjobash i ke premtuar Vjollca Hoxhës, me ardhjen në Top Channel.
- E gjashta, zonja Hoxha, përse po i bie Kadastrës përditë, a ke kërkuar legalizimin e objektit Folie tek pedonalja dhe më pas ndërtimin e një kulle aty?
- E shtata, faqja e facebook, është krijuar nga ekipi i Top Story dhe me ardhjen e Sokol Ballës kjo faqe u kërkua ti kalohej atij. I sugjerojë të ngrejë një faqe vet, siç ka ngritur shumë gjëra.
- E teta, ekipi i Top Story, nuk është njoftuar për ndërrimin e emrit dhe që emisioni politik i Sokol Ballës do të merrte këtë emër.
- E nënta, thirrje për kolegët, ky është TOP CHANNEL!
Vijon….
