Në takimin e mbajtur sot me gazetarët, i pyetur prej tyre për përgjimet e Katanxaros dhe përfshirjen e PS-së në afera me mafien italiane, Rama u përgjig duke cituar më shumë se një herë, konkluzionin e prokurorisë së Katanxaros, sipas së cilit, grupi i hetuar prej tyre, nuk kishte mundur të arrinte asnjë prej planeve e qëllimeve biseduar në regjistrimet e zbardhura.
Prokuroria italiane u shpreh Rama, shkruan, në konkluzione se, në praktikë, pas më shumë se një viti udhëtimesh në Tiranë dhe bisedimesh me njëri- tjetrin, me njëri-tjetrin, s’ka asnjë bisedë mes tyre dhe personave që ata përflasin gjithë ditën e gjithë natën, për investime që do të bëhen në Shqipëri, ato dështuan totalisht, dhe i vetmi investim i bërë, është një dyqan i vogël për shitjen e rrobave të punës, për të cilin prapë ka pasur konflikte mes ortakëve. Janë konkluzione të Prokurorisë Italiane këto. Në vitin 2018 investimi i Ndraghetas në Shqipëri, Gallo Albania, sipas bilanceve të publikuara në QKB, ka shitur mallëra për 5 milionë lekë të reja dhe humbi në fund të atij viti rreth 400 mijë lekë të reja, ndërsa në 2019, siguroi 4 milionë lekë të ardhura dhe 1.8 milionë lekë humbe […]
Ky është citim nga konkluzionet e prokurorisë italiane dhe marrja e këtij llumi dhe servirja e këtij llumi si ushqim për shqiptarët, netëve të gjata të mejhaneve televizive dhe ditëve të gjata të kërkesës për klikime dhe për spektakël, është një turp. Është një turp, i cili mishëron më së miri ata që e ushqejnë këtë lloj qasjeje, që janë të njëjtët që edhe prirjen për t’ia bërë nënën këtij vendi, e kanë prioritet. Sa herë që ju jepet mundësia dhe kur s’ka asnjë mundësi në fakt, sepse kjo është një marrëzi, e pashoqe me asgjë tjetër. Flasin ca italianë, përmendin njerëz, imagjinojnë investime, parafytyrojnë pushtimin e tokës së premtuar, nuk ka asnjë fakt, nuk ka asnjë lidhje, nuk ka asnjë gjë, dhe këtu ngrihet një tym, mirë e the, tymnajë, që është e neveritshme, dhe unë realisht, nuk kam asgjë për të thënë për këtë, por meqë më pyetët, ju lexova konkluzionin e prokurorisë italiane, merrini të gjitha ato faqe, pijani lëngun, e nxirrini prapë e villini nëpër ekrane, e nëpër portale, për tí bërë shqiptarët që t’ju vijë për të vjellë, se ky është edhe qëllimi në fakt, për fat të keq. Kjo për mua është një provë spektakolare e katandisë së opozitës dhe të mediave. Nuk e imagjinoj dot në një vend normal, në një vend ku cdo njeri ka një mikrofon dhe ka një fytyrë në shërbim të publikut, të marrë kohë nga koha e njerëzve, për t’ju hedhur në fytyrë këtë lloj gjelle kutërbuese budallallëku dhe poshtërsie.[…]
Po si mund të bëhet biseda, të mblidhemi tërë këta njerëz këtu, e të flasim për ca llumëra që flasin në italisht me njëri-tjetrin, që nuk rezulton të kenë asnjë impakt në vendin tonë, asnjë investim, e të tregojmë me gisht Partinë Socialiste?
Partisë Socialiste i merrni të keqen ju, të gjithë, që të jemi të qartë, ka përfunduar Rama përgjigjen e tij.
