Teksa ka deklaruar që situata në qarqet e Gjirokastrës dhe Vlorës është aktualisht e qetë, në intervistën e sapodhënë për shtyp, ministri i Mbrojtjes Niko Peleshi, e ka vënë theksin tek situatat e vështira, me të cilat janë përballur forcat e armatosura këto ditë e po ashtu edhe tek fakti që zjarret në këto vatra kanë qenë të qëllimshme.
Sot situata në dy qarqet Vlorë dhe Gjirokastër është shumë më e qetë, tha Peleshi. Në Gjirokastër jemi përballur me një situatë shumë të vështirë, sepse ka pasur disa vatra zjarri në mënyrë të çuditshme. Jemi përpjekur shumë që të mos ketë prekje të fshatit, sidomos në fshatin “Asim Zenel”, ku gjerdani I flakëve ka qenë në largësinë 50 deri në 100 metrave, por më në fund ia kemi dalë me përqendrim të madh zjarrfikësesh dhe fishekzjarresh tokësore dhe ajrore. Natë e mundimshme ka qenë në Pashaliman. Ne e konsideruam të fikur zjarrin mbi Pashaliman, dhe pas mesnatës ka shpërthyer një zjarr i madh pranë bazës së Pashalimanit, ku kishim dislokuar për vigjilencë një numër të madh trupash dhe zjarrëfikësash, dhe rreth orës së 4 të mëngjesit, është shmangur më e keqja. Po punohet ende me helikopter për të fikur vatrat e zjarrit. Sot jemi shumë më optimist, sepse kemi 3 helikopterë në punë, po punohet në disa drejtime, nga Pashalimani në drejtim të Dukatit, por po punohet edhe nga pjesa jugore, nga Palasa, për të mos lejuar avancimin e vatrave të zjarrit në atë drejtim.
Unë jam shumë i bindur, theksoi Peleshi, që kemi të bëjmë me zjarrvënie të qëllimshme. Dhe ato nuk eleminohen me urdhërin e peshkut. Eleminohen se i përgjigjen e gjithë shoqërisa, si një ndërgjegjësim më i madh i të gjithë qytetarëve. Duhet të mos e quajnë spiunllëk, por qytetari. Na kanë dhënë disa emra, janë arrestuar disa veta, për ata ka prova. Edhe vatrat sa më herët të lajmërohen nga komuniteti më mirë është, dhe nuk dua të heq përgjegjësinë që kanë forcat tona të mbrojtjes civile, edhe më pranë, edhe më të shkathëta edhe me më shumë forca, por duhet të kuptoni që ka limite çdo shtet.
Mes të tjerave në fjalën e tij, Peleshi qortoi edhe opozitën, e cila në gjykimin e tij duhet të bëhet palë e të ndihmojë, dhe jo ta rëndojë edhe më shumë situatën, duke shtuar edhe të paqena.
Unë e ndjek politikën edhe nëpër shtetet e tjera, tha Peleshi. Nuk kam parë për shembull në Itali apo në Turqi apo në Greqi, që në kohën e zjarreve, të ketë një histeri kundër atyre që janë në frontin e parë të punës. Sa pak flasin për atë ushtarin që merret me zjarrin atje në majë të palit, sa pak flasim për një grup vajzash nga 21 vjeç, që me shumë pasion shkojnë e ndihmojnë, e pastaj kur kthehen në repart shohin që u ka dale fytyra nëpër portale të opozitës, që kanë punuar me mjete rrethanore. Nuk është e vërtetë. Mos u bëni qesharakë. Nëse di ndonjëri se si fiket zjarri më mirë, le të na i thotë, të na ndihmojë, nuk është ndihmë të tallesh me ushtarin që përballet me zjarrin në atë mënyrë. Është e pamundur ta menaxhosh të gjithë zjarrin në të gjithë Shqipërinë, edhe 30 helikopterë të kesh. Vetëm në Gjirokastër dje ka pasur 10 vatra zjarri.
Më mirë të merremi me faktin se si ka mundësi, në të njëjtin moment, në distancë shumë të largët nga njëra-tjetra të ndizen 10 vatra zjarri, brenda territorit të një bashkie, apo edhe sa territori i një bashkie, dhe kjo është ajo për të cilat duhet të kemi edhe analiza, edhe analistë, edhe ekspertë. Kemi marrë emra, ua kemi dhenë strukturave ligzbatuese, do të ketë investigim, ka të dhëna të mjaftueshmë për të vërtetuar që zjarret janë të qëllimshme e për t’i lidhur ata me emerat përkatës, përfundoi kreu i ministrisë së Mbrojtjes Niko Peleshi.
