Pas konferencës me tone të ashpra të Metës, mbajtur ditën e sotme me gazetarët për të shpjeguar incidentin e tij me policët bashkiakë në FRD, ka reaguar edhe kryeministri Rama.
Sa herë Ilir Meta del, flet, bërtet, shan lajthit, shkruan ai, aq herë e bën të qartë se zgjedhja e 25 prillit është një zgjedhje mes Drejtësisë dhe Ilir Metës; çdo votë për LSI, është një votë kundër Drejtësisë dhe çdo votë për PD, është një votë për Ilirin e Saliun; Luli thjesht ha përshesh.
Kujtojmë që në fjalën e tij, presidenti Meta e cilësoi Bashkinë dhe Partinë Socialiste si “bandë që kërkon të dhunojë pluralizmin politik dhe zgjedhjet e lira, duke këmbëngulur në fjalën e tij, se lufta që ai po bën, është për të mbrojtur Kushtetutën e Shqipërisë. “Është detyrë e Presidentit t’í dalë për zot Kushtetutës dhe nuk pret nga askush tjetër që t’i dalë për zot Kushtetutës së Shqipërisë, gjakut të derdhur për demokraci, gjakut të derdhur nga Havzi Nela, bijtë e xhelatëve që s’kanë kërkuar falje akoma, duan të terrorizojnë një popull të tërë, me hajdutët dhe trafikantët me këlysht e Ndraghetës. Përgjigjen do ta marrin kudo, nëse do të vazhdojnë në këtë rrugë. Përgjigjja do të jetë një popull i tërë problematik!”, u shpreh Meta.
