Teksa kreu aktual i PD-së deklaron se nuk do të mblidhet asnjë lloj kuvendi në PD që do të diskutojë vendimet e qeverisë amerikane, ka reaguar menjëherë edhe ish lideri demokrat Sali Berisha, i cili përkundër deklaratës së Bashës, deklaron se kuvendi i PD-së do të mblidhet sipas statutit të PD-së e se askush që tmerrohet prej tij nuk do mund ta pengojë.
Për 8 vjet Edi Rama vazhdon të qëndrojë në pushtet, sepse është në pazar me dikë që është shumë i kënaqur të qëndrojë edhe 80 vjet në opozitë, shkruan Berisha në statusin e tij. Kuvendi i PD do mblidhet në përputhje me statutin e PD dhe askush që tmerrohet prej tij nuk mund ta pengojë. Ai nuk do të mblidhet për të shqyrtuar vendimet e asnjë qeverie, por vetëm vendimet e pengut të Edi Ramës. Kuvendi do mblidhet gjithashtu për të shpëtuar PD-në nga pazaret e peng-Bashës me Edi Ramën, dhe për t’u rikthyer dinjitetin dhe shpresën demokratëve pas 4 humbjesh radhazi përballë regjimit më të korruptuar dhe inkriminuar të Europës.
PD-së nuk i duhet nje lider i kapur peng, që bën pazar me Ramën dhe shpall non grata bazën e partisë, i tmerruar prej saj, përfundon Berisha statusin e tij.
