Pas shfaqjes së planeve nga brenda PD-së ku shfaqej edhe dera e hekurt për të cilën përflitej se do të blindonte dyert e PD-së, kreu historik i kësaj partie Sali Berisha, ka shkuar ditën e sotme pranë selisë së PD-së, prej nga u bëri thirrje demokratëve të mblidhen pranë selisë e ta nxjerrin Bashën e të marrin ndërtesën. Mes të tjera Berisha sqaroi se qëllimi i tërë kësaj që po bënte, qe të respektohej parimi kryesor i ngritjes së shtetit dhe organizatave të tilla si punë e partive të mëdha, që është “shumica vendos, pakica respektohet.
Unë me këtë rast dua të sqaroj çdo qytetar të këtij vendi, tha Berisha, se qëndrimi ynë nuk ka të bëjë me një zyrë, me një tryezë, dhomë, karrige apo gjëra të tilla, por ka të bëjë me zbatimin e parimit më themelor mbi të cilin ndërtohen organizatat e lira, shoqërite e lira, vendet e lira, sipas të cilit shumica vendos, pakica respektohet. Në qendrimin e deputetit Basha, del e qartë si drita e diellit, se ai si pakicë kërkon të dhunojë shumicën, t’i konfiskojë shumicës ndërtesën e saj, shtëpinë e demokratëve, duke e trajtuar sikur ta ketë pronë personale.
Ndaj dhe unë ftoj sot gjithë anëtarët e PD, 44 mijë, por edhe gjithë të tjerët që për një arsye apo një tjetër nuk morën pjesë në referendum, që firmosën shkarkimin e ish-kryetarit të tyre, për dhunimin flagrant të statutit të parimeve dhe të cdo lloj norme tjetër demokratike në PD, ftoj të gjithë anëtaret dhe anëtaret, të bashkohen për të marrë në dorëzim shtëpinë e tyre e për ta shndëruar atë në shtëpi lirie, në një protestë paqesore. Garantoj të gjithë punonjësit e kësaj ndërtese, se protestuesit nuk kanë as hatërmbetjen më të vogël ndaj tyre. Problemi i vetëm që kanë protestuesit, është hapja e dyerve të kësaj shtëpie dhe çlirimi i saj nga pengu i Ramës, peng Basha. Nesër fltoj gjithë deputetet e PD, të jenë këtu me anëtarët e tyre. Nuk mundet më ju deputetë të pranoni këtë tragjedi që luhet në kurrizin tuaj për interes të Edi Ramës, tha mes të tjerave Berisha, i cili akuzoi sërish Bashën se e ka mbushur selinë e PD-së me “kriminel delikuentë, që rëndojnë mbi shpatullat e tyre vrasje njerëzish, trafiqe kriminale, deri tek fanatizma dhe ekstremizma të dënueshme”.
