Gjatë konferencës për shtyp dhënë sot përpara gazetarëve, kreu i qeverisë Rama ka komentuar edhe sjelljen e policisë së shtetit ndaj banorëve të lagjes 5 maji në Tiranë, të cilët u tërhoqën zvarrë nga banesat e tyre, duke deklaruar më vonë se ishin në mes të katër rrugëve dhe nuk kishin mundur të merrnin asgjë nga shtëpitë, kur policia kishte ardhur e i kishte nxjerrë përjashta me forcë.
Ajo nuk është dhunë, por është ushtrimi i forcës së ligjit për të gjithë ata që I dalin përpara ligjit, u dalin përpara njerëzve me forcë, u shpreh Rama teksa iu kërkua një mendim mbi situatën nga gazetarët. Ato do të jenë pamje të përsëritura sa herë që në emër të një të drejte individuale, do të shkelet e drejta e përbashkët e do të shkelet ligji. Unë di që banorëve u është dhënë qartësisht drejtim, dhe qartësisht të gjithë banorët kanë mundësi të përfitojnë të drejtat që u takojnë. Asnjë banor nuk hidhet në rrugë, por zhvillimi i këtij vendi dhe e mira e përbashkët, nuk merret peng nga askush, kështu që sa herë që do të jetë ketë banorë që do të bëjnë këtë, aq herë do të shikojnë policinë të bëjë detyrën e vet. Kaq e thjeshtë është.
Opinioni i banorëve është dëgjuar me dhjetra herë, tha mes të tjerave Rama, dhe ajo që duhet t’ju interesojë juve është të verifikojë këtë që po them unë. A janë këta banorë të hedhur në rrugë të madhe? Apo janë secili me një mundësi tjetër siç i takon. Unë po ju them që është kjo e dyta dhe sigurisht që ne do të rindërtojmë të gjitha apartamentet për të pastrehët, do të bëjmë një program strehimi shumë më të madh, që shkon shumë përtej tërmetit, do tu japim të gjithë ç’u takon, por asnjë nuk mund t’i imponohet një komuniteti dhe një shteti, për të mbajtur atë që nuk i takon, sepse edhe pse ato janë ndërtime të paligjshme, atyre u është ofruar kompensim, përfundoi Rama.
Kujtojmë që ditën e djeshme banorët e lagjes 5 Maji u përleshën me Policinë e Shtetit, e cila i largoi me forcë ata nga banesat e tyre në këtë lagje.
