Ka nisur ditën e sotme edhe viti i ri akademik për studentët shqiptarë, të cilët kthehen në auditore pas një periudhe rreth 2 vjeçare mësimbërje onlajn.
Ndryshe nga herët e tjera, ky fillim-vit është karakterizuar nga përplasjet e studentëve me rojet e fakulteteve apo policëve që gjendeshin aty, për shkak të kontrollit të çertifikatës së vaksinimit apo testit PCR, që do të dëshmonte se ata nuk mbartnin virusin e covid-19.
Kujtojmë që kreu i qeverisë Rama e ka ka bërë të detyrueshëm vaksinimin e studentëve, ose në mungesë të pasaportës së vaksinave, pasjen e një testi PCR, masë kjo që ditën e sotme prodhoi tensione të forta mes studentëve që donin të hynin nëpër auditore dhe stafit të fakulteteve, të cilët janë përpjekur të lejojnë vetëm ata me dokumentacionin e duhur.
Rezistenca e mësymje të tilla janë vënë re qysh në oret e para të mëngjesit thuajse në të gjitha universitetet në kryeqytet, ndërsa një tensionim më i madh i situates, është vënë re në fakultetin e Histori-Filologjisë, ku dëgjohen qartë studentët teksa i japin zemër njeri-tjetrit: “Ç’lesh vaksinimi thoni, hyni brenda, mos kini frikë. Universiteti është i juaji!”.
