Ende pa u bërë të tretat, mediat argjentinase janë mbushur me debatin se kujt do t’i shkojë pasuria e të ndjerit Maradona. Sipas mediave, pasuria e tij, duhet të ishte rreth 275 milionë dollar, por Luis Ventura, gazetari që i ka ndenjur pranë, thotë se Maradonës nuk i ka mbetur më kokërr leku, e se ia kanë ngrënë të tëra ata që i rrinin pranë.
Të tëra këto detaje, Luis Ventura i ka rrëfyer në një shoë televiziv, ku ka përgënjeshtruar shumën e pasurisë dhënë prej mediave argjentinase disa kohë më para.
Ç’fund bënë paratë? I ka shpenzuar, se ishte dorëshpuar, rrëfen Ventura, dhe në pjesën më të madhe ia kanë ngrënë nga ata që i rrinin pranë e donin t’i zhvasnin xhepat.
Por pavarësisht kësaj, Maradona zotëron edhe një numër të madh pasurish të patundshme e ajo për të cilën mund të vihet bast, është beteja ligjore që mund të nisë mes fëmijëve të tij dhe ish grave.
Ndërkaq, thashethemet flasin edhe për një testament që mund t’ia ketë lënë ish-gruas, e të bijave Dalma e Giannina. Thuhet se futbollisti ka njohur gjashtë fëmijë, nga pesë gra të ndryshme, dhe se një vit më parë iu kundërvu të bijës, duke i thënë që s’do t’u linte gjë, e se do ta dhuronte për bamirësi pasurinë.
