Rreshje të forta shiu pushtojnë nga dita e nesërme Shqipërinë, e cila sipas Shërbimit Metereologjik Ushtarak, do të pushtohet këto ditë nga rreshje shiu, rrebeshi e shtrëngata.
Parashikimi i plotë nga SHMU
Përshëndetje nga SHMU!
Për ditën e nesërme vendi ynë do të ndikohet nga kushte të paqëndrueshme atmosferike si rezultat i kalimit të një fronti të ftohtë atmosferik shoqëruar me masa ajrore të lagështa me origjinë veriperëndimore.
Moti parashikohet me vranësira të dendura shoqëruar me reshje shiu të herëpashershme dhe lokalisht të vazhdueshme me intensitet të ulët dhe kryesisht mesatar në formën e shtrëngatave. Përgjatë ultësirës perëndimore reshjet lokalisht dhe në periudha afatshkurtra pritet të jenë me intensitet deri dhe të lartë në formën e rrebesheve dhe stuhive shoqëruar me shkarkesa elektrike dhe breshër. Në zonën e Alpeve dhe relievet e larta malore në verilindje pati reshje të dobta dëbore.
Era do të fryjë me drejtim jugperëndim-veriperëndim me shpejtësi mesatare 1-5 m/sek, ndërsa përgjatë vijës bregdetare e lugina era fiton shpejtësi 8-12 m/sek, shoqëruar me valëzim në dete të forcës 1-3 ballë.
Temperaturat parashikohen:
në zonat malore 10 deri 15°C
në zonat e ulëta 10 deri 19°C
në zonat bregdetare 12 deri 18°C
