Është ndarë nga jeta në moshën 85 vjeçare Kadrie Kadare, motra e shkrimtarit Kadare, i cili, një muaj më parë ka humbur dhe të vëllanë, dr. Shahin Kadarenë.
Lajmin e trishtë e bën me dije profesor Sadik Bejko, i cili në fejsbukun e tij shkruan se e ndjera është përcjellë për në banesën e fundit prej shkrimtarit Kadare dhe një rrethi të ngushtë njerëzish, në një ceremoni ngushtësisht familjare.
Statusi i plotë i prof. Sadik Bejko
Sot në moshën 85 vjeç është ndarë nga jeta Kadrie Kadare. Ajo ishte një grua me arsimim të lartë, me kontribute si mësimdhënëse, lektore në Universitet. Ajo ka një kontribut të pavërejtur si korrektore e veprës së Ismail Kadaresë.
Ka punuar dhe në disa nga gazetat me të rëndësishme në këto vite të tranzicionit. Korrektore në gazetat Albania, Shekulli, 55. Panorama, Rilindja Demokratike, Mapo.
Etj. Sot, Ismail Kadare në intimitet, në heshtje solemne, në rreth të ngushtë familjar, ka përcjellë në varrezat e Sharrës motrën e tij të vetme. Para një muaji u nda nga jeta vëllai i tij, dr Shahin Kadare. Të qoftë dheu i lehtë, Kadrie Kadare. Paqe, prehje e përjetshme për ty.
