Pas marrjes së Tuiterit nga Elon Musk, ka reaguar edhe ish presidenti i Shteteve të Bashkuara të Amerikës, Donald Trump, llogaria e të cilit në këtë rrjet u bllokua pas mësymjes së Capitol Hillit.
Tuiteri duhet të punojë tashmë fort për t’u pastruar nga bllokimet dhe llogaritë false. Do jetë më i vogël, por do të jetë më i mirë, ka shkruar Trump në rrjetin e tij social Truth, një përshendetje kjo ndaj drejtuesit të ri të këtij rrjeti social.
Ngjarja në fakt ka hapur shumë diskutime, meqënëse dhe vetë Musk ka deklaruar që prej prillit se qëllimi i tij është të mbështesë lirinë e fjalës dhe të punojë për të zhbllokuar potencialin e jashtëzakonshëm të tuiterit, duke ndikuar në një farë mënyre edhe në balancat politike në vend. Sipas një pjese të konservatorëve, platforma mund të favorizojë liberalët dhe t’u ulë disi pushtetin zërave konservativë.
Ndërkaq Musk ka deklaruar po ashtu, se ka ndërmend ta rimendojë qasjen e këtij rrjeti social ndaj përmbajtjeve me impakte të mundshme në panoramën politike. Të enjten e shkuar, për të komunikuar marrjen e Tuiterit, Musk shkroi: “Zogu është i lirë”, duke iu referuar logos së vetë rrjetit social, për të treguar kursin e ri të tij.
