Me një vendim të Këshillit të Ministrave, Qeveria shqiptare ka miratuar paketën e barnave për trajtimin ambulator në banesë, që do të financohet prej Fondit të Sigurimit të Detyrueshëm të Kujdesit Shëndetësor.
Sipas këtij vendimi, gjithë të diagnostikuarëve me Sars-Cov-2, që kanë sigurim shëndetësor, do t’u rimbursohen ilaçet e marra për trajtimin në banesë.
Paketa e miratuar do ketë dy skema trajtimi, në përputhje me formën e shfaqjes së sëmundjes, sipas asaj që ka miratuar Komisionit Teknik të Ekspertëve.
Skema 1 (forma e lehtë) do rimbursohet me jo më shumë se 1 650 (një mijë e gjashtëqind e pesëdhjetë) lekësh, kurse skema 2 (forma e mesme), me jo më shumë se 10 900 (dhjetë mijë e nëntëqind) lekë.
Është mjeku i familjes ai që do lëshojë recetën për rimbursim, duke ndjekur gjithnjë udhëzimin e Komitetit të Ekspertëve, mbi format e shfaqjes së sëmundjes.
Theksojmë sërish që nga ky vendim përfitojnë vetëm ata që kanë sigurime shëndetësore, ndëkërkohë që nuk dihet se si do t’ia dalë mbanë pjesa tjetër, ose shtresat në nevojë, të cilat me gjasa, mund të jenë edhe pjesa me më shumë vështirësi ekonomike në këtë drejtim.
