Në faqen e saj zyrtare në fejsbuk, ministrja e Drejtësisë Etilda Gjonaj, ka vendosur një status të stërgjatë, ku flet për protestën dhe sidomos për përdorimin e saj nga politika:
Kemi vënë re fare mirë që kemi një protestë të dhunshme, shkruan ajo. Madje mund të them që nuk e meriton më të konsiderohet një protestë, përsa kohë që gjithçka lidhet me aktet e dhunshme që po kryhen nga ata që janë në rrugët e qyteteve. Dhe keqardhje ndjehet edhe për faktin, se ka shumë të mitur që janë përfshirë në këto protesta, që janë përfshirë në këto akte të dhunshme, ku padyshim janë të nxitur nga segmente politike, segmente të PD, LSI […] është fatkeqësi kur shikon sesi këta të mitur, që janë edhe nën moshën e përgjegjësisë penale, janë përdorur nga subjektet politikë, duke qënë edhe pjesëmarrës vetë në protesta, ,siç kemi parë në rastin e Shkodrës duke u sjellë një dëm shumë të madh fëmijëve që janë e ardhmja e vëndit.
Për fatin e keq, vazhdon ministrja Gjonaj, shikojmë që ka shumë raste edhe si ai i Shkodrës, ku vetë Kryetarja e Bashkisë ishte pjesë e protestës që u krye, dhe nga pamjet dallojmë që janë një grup fëmijësh që më pas kryen aktet e dhunshme edhe ndaj selisë së PS. Do të ishte shumë mirë që para se Kryetar Bashkie, drejtues të institucioneve, të marrin pjesë në këto protesta të cilat janë të dhunshme, duhet të shikojnë përgjegjësinë e tyre jo vetëm ligjore, por edhe atë morale. Sepse një Kryetar Bashkie ka minimalisht përgjegjësinë të ndërtojë politika për të rehabilituar fëmijët, për t’i dhënë një mundësi që të kenë programe sociale.
Këtë e them edhe nga eksperienca ime pasi për fat të keq ndjej një keqardhje shumë të madhe pasi atë politikë që ne po e ndërtojmë me shumë mund për të parandaluar të miturit që të shkojnë drejt rrugës së krimit, për të restauruar drejtësinë penale për të mitur, edhe në bashkëpunim me bashkitë e të gjitha qyteteve në vënd, e shikon që të lëkundet nga partitë politike të cilët përdorin këta të mitur që të vijnë në pushtet.
Ndërkohë kujtojmë që më herët, po sot, Policia e Shtetit ka njoftuar gjithashtu se për protestën e djeshme në Shkodër, “ka proceduar penalisht 8 persona, e po ashtu edhe 17 minorenë, për shkatërrim prone, si dhe 21 shtetas të tjerë, për pjesëmarrje në tubime të paligjshme. Gjithashtu, thuhet në deklaratën e tyre, janë proceduar si organizatorë të kësaj proteste, për veprën penale “Organizimi dhe pjesëmarrja në grumbullime e manifestime të paligjshme shtetasit V. A., A. S., A. Q., Z. Gj., S. H. , N. M., L. M. dhe I. Q’
