Është prononcuar për çështjen e detit në Hagë, edhe Presidenti i vendit Ilir Meta, i cili, përmes një statusi në fejsbuk, shprehet se nuk ka dijeni apo njoftim për ndërprerjen e marrëdhënieve dy palëshe.
Duke mirëkuptuar ndjeshmërinë e lartë të opinionit publik shqiptar shkruan ai, mbi aktin më të fundit të nxjerrë nga autoritetet më të larta të Republikës së Greqisë dhe pasojat e mundshme të tij ndaj vendit tonë, dëshiroj të evidentoj si vijon: Në ushtrim të detyrave dhe përgjegjësive të mia dhe në zbatim të vendimit të Gjykatës Kushtetuese Nr.15/2010, kam autorizuar Plotfuqinë për Negocim Nr.733, në emër të Republikës së Shqipërisë, të ekipit negociator me përbërjen e 13 anëtarëve për negocimin e “’Projekt Marrëveshjes ndërmjet Republikës së Shqipërisë dhe Republikës së Greqisë për kufizimin e zonave të tyre detare’, me qëllim saktësimin e Vijës Delimituese të Kufirit Shtetëror Detar dhe delimitimin e Shelfit Kontinental dhe Zonës Ekskluzive Ekonomike midis të dy vendeve””, datë 19.03.2018. Gjatë gjithë kohës, kam ofruar të gjithë bashkëpunimin në këtë proces, duke siguruar respektimin e vendimit të Gjykatës Kushtetuese. Deri në këto momente, nuk kam asnjë njoftim apo kërkesë zyrtare, që të sugjerojë ndërprerjen, pezullimin apo përfundimin e procesit të negociatave dypalëshe, nga ekipi negociator apo nga qeveria shqiptare. Për çdo zhvillim, që lidhet drejtpërdrejt apo ndikon në procesin e negociatave për delimitimin e hapësirës detare ndërmjet dy vendeve, kam kërkuar informacion shterues dhe analizë të plotë të qeverisë shqiptare, sipas përgjegjësive, që i takojnë sipas ligjit. I rikujtoj edhe një herë përfaqësuesve të institucioneve në të gjithë nivelin hierarkik shtetëror, detyrimin dhe përgjegjësinë për përputhshmërinë e plotë të veprimtarisë së tyre kushtetuese dhe ligjore, në shërbim të interesave shtetërore dhe kombëtare. I siguroj të gjithë qytetarët shqiptarë se do të vijoj të ushtroj me përgjegjësinë maksimale shtetërore dhe kushtetuese detyrat e mia dhe se nuk do të lejoj për asnjë moment të cenohen interesat shtetërore dhe kombëtare të Republikës së Shqipërisë nga cilido individ, që keqpërdor autoritetin e deleguar nga populli shqiptar. Sipas traditës së vendosur, pasi të vihem në dijeni të plotë të informacioneve të kërkuara zyrtarisht, do të bëj plotësisht transparent vlerësimet dhe qëndrimet e mia në lidhje me të gjitha zhvillimet ndaj kësaj çështjeje.
Kujtojmë që javës që shkoi, Shqipëria dhe Greqia ranë dakord ta shpien mosëmarrëveshjen e tyre për kufirin detar në Gjykatën e Hagës. Ministri i Jashtëm grek Dendias, pas takimit me kryeministrin Rama, e bëri publik këtë vendim për mediat greke. Ndërkaq Rama u shpreh se kështu çështja nuk do të ishte as në dorën e shqiptarëve dhe as në dorën e grekërve, por në atë të drejtësisë ndërkombëtare, dhe kështu të dyja vendet do përqendroheshin bashkëpunimin ekonomik e rajonal.
Greqia po përpiqet të caktojë kufijtë detarë me fqinjët, Turqinë, Italinë, Egjiptin, dhe deri më tani e ka caktuar atë vetëm me Italinë dhe Egjiptin.
Edhe me Shqipërinë e kishte një marrëveshje kufiri detar, atë të 2009-s po ajo u hodh poshtë nga Gjykata Kushtetuese e Shqipërisë, e cila e anuloi marrëveshjen një vit më vonë.
Ngjarja ka ngjallur reagime të shumta në opinionin publik, ku më së shumti mbizotëron ideja se Rama po i fal detin Greqisë, në kundërshtim me Kushtetutën.
