Në një prononcim për mediat nga Apollonia e Fierit, sot paradite, Meta u shpreh se deri më 26 prill do rrinte në Vlorë. Unë dje kam pasur një darkë me të gjithë gazetarët e Vlorës, informale, kanë qenë të ftuara të gjitha mediat, tha Meta. Në darkë qenë ftuar edhe zoti Bujar Leksaj përfaqësuesi i opozitës dhe zoti Damian Gjiknuri, dhe zotin Damian e kam teleefonuar vetë përmes një telefonate në prani të dy kolegëve tuaj gazetarë, Nikollë Lesi dhe Ylli Rakipi, pasi shpesh ai është detyruar nga kryeministri që të shpifë rreth takimeve apo lëvizjeve të mia në Vlorë.
Të jetë i qetë edhe Damiani, edhe pse nuk erdhi në një darkë, e cila në fund të fundit fokusin e kishte tek transparenca dhe integriteti i procesit zgjedhor, që Vlora do jetë një shembull model i zgjedhjeve të lira e të ndershme, edhe që të mos provokohet me shakara pa kripë që në thelb janë një shprehje e rrugaçërisë dhe banditizmit, për të përsëritur zgjedhjet e tipit “tërmet” në Dibër apo të Shijakut, që turpëruan Shqipërinë përpara gjithë botës dhe që sollën një qeveri me probleme të rënda të legjitimitetit. Të jetë i qetë edhe kryeministri edhe tërmeti! Deri në 26 prill do jem në Vlorë. Do jem ditën dhe do jem natën, në çdo kohë do kem këtu dhe janë të mirëpritur të vijnë të rrijnë më mua, por duhet ta kenë të qartë që çdo skenar i tyre i zi, i ndodhur në Vlorë, do të jetë i papranueshëm dhe i palejueshëm, sepse Vlora ia bën fora. Të mësojnë poezitë e Ali Asllanit, në mënyrë që të kuptojnë që me Vlorën nuk bëhet shaka.
Tjetra që do t’i them zotit Rama është që unë e kuptoj pse ai ka shqetësimin e Ilir Metës. Ai ka shqetësimin, se Ilir Meta përpiqet dhe bën gjithçka për të garantuar zgjedhje të lira dhe të ndershme dhe së dyti, sepse ai po përdor gjithë pushtetin e paligjshëm, siç e ka përdorur deri më tani, për të blerë, shantazhuar dhe korruptuar edhe opozitën. Kuptohet që shpesh ka pasur suksese në këtë rrugën e tij, qoftë të korruptimit qoftë të provokimit dhe pengesa, diga kryesore, për të mos mbytur përfundimisht demokracinë dhe shtetin e së drejtës dhe shpresën për të ardhmen e shqiptarëve, ka qenë Ilir Meta. Kjo është një betejë finale, nuk është si betejat e mëparëshme. Eshtë një betejë finale për 100 vitet që vijnë, dhe nuk është një betejë mes Metës dhe Ramës, përkundrazi, Edi Rama po përdoret si kuisling nga armiqtë e Shqipërisë, me qëllim që të nxjerrë në shitje edhe gjithçka ka ngelur pa u shitur, nga pasuritë e shqiptarëve, nga pronat, nga financat publike, në mënyrë që t’i zëvendësojë vlonjatët me bangladeshas dhe fierakët me indianë.
