E gjeta më në fund kë kisha patronazhiste! E gjeta se po më brente sikleti. Thashë, vajta dy vjet që s’kam takuar njeri, më e pakta 1 vit e ca prej pandemisë, ku më gjeti, që më ka marrë në patronazh e më tregon për kë duhet të votoj?!
Kërkova dhe e gjeta. Për të kuptuar 1 si funksiononte sistemi i patronazhimit të individit për t’i orientuar votën dhe 2 se cili qe profili i patronazhistit tim, njeriut që kishte marrë përsipër t’i vihej punës e të merrte vesh seç kam unë në mendje, për kë do votoj, kur dhe unë vetë ende nuk e kam të qartë nga do marr, se të gjitha forcat politike, saç kanë të mira, kanë edhe të këqia, e ngado ta kthesh krahun, prapë gjalpin në lakror e ke me këtë kod zgjedhor.
Dhe, për trishtimin tim të madh, patronazhistja ime qe një grua, një grua nga lagjja ime e vajzërisë, një komshie që e rastisja rrallë, që më qasej se donte ta ftoja nëpër emisione, ngaqë bënte poezi. Qe një grua, në mos gaboj se kanë kaluar mbi 8 vjet, e divorcuar, me një fëmijë, të cilin e rriste e vetme. Kur e pashë në foto (rroftë Google! ) më ndërmendi edhe një herë 1, mjerimin e shoqërisë ku rrojmë dhe 2, falsitetin mbi të cilin ngrihen bazat e të dhënave të partive politike tek ne. Partitë bëjnë sikur kanë të dhëna dhe patronazhistët, me gjasa për të ngrënë ndonjë çap bukë, bëjnë sikur raportojnë, duke ndërtuar një pseudo-parashikim, që shpie pastaj, pas përfundimit të zgjedhjeve, tek të famshmet debate për mosnjohjen e rezultateve. Dhe domosdo me këto lista. Por kaq për patronazhisten dhe patronazhistët, të cilët me gjasa vazhdojnë e mbajnë me ujë të ngrohtë partitë, për të marrë ndonjë lek gjëkundi se krizë, se, në mos do rrjedhë, po pikojë.
Gjëja më e frikshme ndërkaq – mua më duket si shkelje penale, se u ndjeva sikur më kishte vjedhur dikush kartën e identitetit (nuk e di a mund ta ndërroj më e të marr një numër tjetër ID-je) – është numri i kartës, ashtu ashiqare, në një listë a disa lista, në dorë të kush e di kujt!
Druaj që patronazhistja të jetë në dijeni të numrit të kartës së identitetit së të patronazhuarit. Nisur nga rasti personal, zonja në fjalë as ka pasur shansin t’i afrohet kartës sime të identitetit. Atëherë, çne ID-ja ime në atë listë, apo në këdo listë? Përse i duhet ID e individit një partie politike? Nëse partitë kanë ID e votuesëve, përse atëhrë ne votojmë në mënyrë të fshehtë, po me kartë identiteti?
Pikëpyetjet janë të shumta, por unë nuk qaj dhe aq hallin e politikës, se sa atë të vjedhjes së të dhënave për qëllime përfitimi. Kush e heton këtë? Këtë dua të di, dhe c’po ndodh me ID e njerëzve, që tashmë janë rrugëve e onlajn?
Ndërkaq, partitë bëjnë mirë të rinovojnë të dhënat. Jo gjithnjë patronazhistët qenkërkërshin treguar të sinqertë me to.
Copyright © MetropolPost.al
