Sapo ka dalë në Itali, libri më i ri i autores Elisabetta Gnone, aq e njohur dhe aq e dashur edhe për fëmijët shqiptarë. “Historia e humbur'” është titulli që rikthen edhe njëherë aventurat në fshatin e lisit magjik, nën shoqërinë e dy motrave po magjike, Vanilja dhe Pervinka.
Ngjarjet tashmë vijnë në ujëra të tjera. Koha ka kaluar dhe shumë gjëra kanë ndryshuar në Fairy Oak. Kështu, teksa zhyten nëpër kujtime duke parë fotografitë e vjetra përpara një filxhani çaj, nisin e kujtohen miqtë e vjetër dhe aventurat e mëdha. Kur kujtimet mbërrijnë në vitin e balenës, zemrat e vogëlushëve fillojnë e rrahin fort. Ç’vit qe ai! Gjithçka nisi me një leksion historie, vazhdoi me një legjendë dhe u ndërlikua kur secilit prej nxënësve të shkollës së nderuar Horace McCrips, iu desh të bënte pemën e vet gjenealogjike.
Teksa hetojnë mes arkivave me miqtë e përhershëm, binjaket Vanilja dhe Pervinka vihen në gjurmët e një historie të humbur dhe personazheve të saj të mistershëm.
Dhe teksa vështrimet e tyre na shpien në luginën e mrekullueshme të Sheshnajëgjelbrës, miqësitë e vjetra konsolidohen, të reja lindin, dashuri të reja deklarohen dhe dalin në pah ëndrra që bëhen realitet.
Kujtojmë që për lexuesin e vogël kanë ardhur në shqip pesë nga krijimet e autores Gnone, aventurat e Olga Papelit me Olgën prej letre dhe Xhumi ï Zi, si dhe saga e Fairy Oak, me tri librat e tij, Sekreti i binjakeve, Magjia e Territ dhe Fuqia e Dritës, botuar nga shtëpia botuese Dituria, me përkthimin e Albana Nexhipi Lekaj.
