Deputetja demokrate Ina Zhupa dhe deputeti socialist Erion Brace janë përplasur ditën e djeshme në Kuvend për çështjen e mediave dhe dizinformimit, debat që ka shkarë në një situatë banale.
Sa më poshtë, MetropolPost ju sjell debatin e plotë mes të dyve, e po ashtu edhe deklaratën e deputetit socialist Erjon Braçe, sa i takon hetimit të mediave.
Zhupa: E kërkova fjalën si kryetare e Komisionit të Medias, sepse jam shumë e shqetësuar që deklaratat tuaja, më në fund politike, tregojnë qartësisht vullnetin e maxhorancës, për të përdorur Komisionin e Dizinformimit për luftë dhe ndjekje ndaj mediave. Deklarata e djeshme e kryetarit të Dizinformimit që i bënte thirrje Prokurorisë që të hetonte dhe të çonte për ndjekje penale të gjithë gazetarët që kishin guxuar… Jo jo, nuk po e dizinformojmë publikun, po themi një të vërtetë që e kanë thënë të gjitha mediat, ju që e ngritët një komision gjoja për propagandën e Rusisë e të Kinës, tani po e përdorni pse media po shfaq që komunikata e Policisë së Shtetit, është e rreme, që u jep zë dëshmitarëve, që i jep zë prindrit të Luisit, dhe del ai zotëria atje dhe thotë që duhen çuar gazetarët dhe mediat për ndjekje penale. Kërkesa ime ndaj jush, meqënëse tani u shfaq qartësisht se përse e doni Komisionin për Dizinformim, dhe si do ta përdorni gjatë fushatës elektorale për gjitha mediat që do bëjnë lajme kundër komunikatave tuaja, është hiqni dorë, mbylleni komisionin, njoftoni ndërkombëtarët të shikojnë që ajo që thamë ne doli. Këta duan të persekutojnë mediat që nuk çojnë ujë tek qeveria. Faleminderit kryetare.
Braçe: Si mundet ta lë pa replikë unë, kur kjo mediat i di rubinet. Ça të them unë! Dëgjojani fjalinë kryetares së Komisionit të Medias, Informimit e të tjerave me radhë. Media që nuk çojnë ujë tek qeveria! Unë e di që uji mbahet o nëpër kanale o nëpër tuba, nuk mbahet nëpër media, shumë e thjeshtë, në media mund të pihet, megjithatë e dashur kryetare, e para nga të gjitha mos u lyej me parfum, e dyta, prit thonjtë se është shfaqje e huaj të vish në parlament me këtë gjë, siç vjen ti. Kjo është e para, e dyta, në asnjë sekondë të mbledhjes së djeshme të komisionit të posaçëm, në asnjë sekondë të asaj që unë kam thënë para mediave, nuk kam kërkuar që të hetohen media apo gazetarë. Kam thënë qartësisht, që duhet të hetohet deri në fund ky krim, të vihen para përgjegjësisë të gjithë autorët, dhe po nga ana tjetër kam kërkuar dhe do vijoj ta kërkoj, që autoritetet të hetojnë dizinformimin, që ka një qëllim shumë të qartë e të pastër politik. Ti je njëra nga ato që duhet të hetohen për dizinformim dhe që mbi të gjitha dizinformon fare hapur këtu në Kuvendin e Shqipërisë. Që ti nuk di të lexosh këtë e di, por që nuk dëgjon, ky është problem tjetër, është problem shumë i madh mental pastaj. Deklaratat janë publike, dëgjoji, zbardhi, po nuk di t’i zbardhësh t’i zbardh unë dhe është shumë e qartë që unë nuk e kam thënë atë, siç është shumë e qartë që edhe ti mund të dukesh si ruse, por nuk je ruse.
Zhupa: Faleminderit zonja kryetare, në mungesë të dhënies së fjalës për replikë me zotin xha Sulo nga filmi “Kapedani” alias Braçe, doja të thoja, po, zoti Braçe, keni një problem shumë të madh me gjatësinë, por nuk ta zgjidh dot unë këtë problem dhe unë nuk i dëgjoj ata nën 1.50 metra, është e vërtetë. Unë nuk e di kush ta jep të drejtën që të më quash si ruse, se unë nuk ia jap të drejtën të të quaj kone, edhe pse ty të quajnë të gjithë. Por megjithatë kjo është çështje personale. Me thënë të drejtën, nga anët e mija, nga unë vij, fëmijët ne i trajtojmë me shumë repsekt dhe i mbajmë mirë, dhe kur futen në çështje të të mëdhenjëve, ne kemi një shprehje, dhe themi “O Erjon t’u rrittë boja, sa shumë m… të ha goja”!
Pas këtij reagimi të zonjës Zhupa deputetët e PS-së lanë sallën duke nënkuptuar kërkimin e një ndjese nga ana e saj për gjuhën e përdorur.
