Është ndarë sot nga jeta në moshën 64 vjeçare gazetari investigativ hollandez Peter R. Devries, i cili u godit me pesë plumba në kokë thuajse 9 ditë më parë, në Leidseplein të Amsterdamit, teksa dilte nga studioja e emisionit.
Edhe pse policia holandeze ka arrestuar disa persona, ende nuk janë të qarta motivet dhe se kush shtiu mbi gazetarin hollandez.
Sipas medieve vendase, dyshohet se kohët e fundit ai qe përfshirë në një rast gjykimi të niveleve të larta për drogë e vrasje, njohur në Hollandë si procesi “Marengo”, ku kishte pranuar të përfaqësonte Nabil. B, një dëshmitar të rëndësisëm të këtij procesi.
Shumë analistë pohojnë se vrasja e tij në mes të ditës, ngjasonte me vrasjet e tjera urdhëruar prej të dyshuarit kryesor të çështjes “Marengo”, Ridouan Taghi, e se me gjasa në këtë krim është dora e tij.
Devries qe një nga gazetarët më në zë investigativ në Holandë, i njohur për punën e tij me krimet e niveleve të larta, si rrëmbimi i Freddy Heineken në vitet ‘80 apo zhdukja e turistes amerikane Natalee Holloway në Aruba nel 2005, pohojnë mediet vendase.
Sulmi ndaj tij me armë, ngjalli edhe reagimet e shumë liderëve europianë, të cilët e cilësuan krimin si një atentat ndaj fjalës së lirë.
Është thuajse e pamundur ta kuptoj, u shpreh për ngjarjen kreu i qeverisë holandeze Mark Rutte. Mendimet e mia janë me familjen, të afërmit, miqtë, kolegët, dhe tërë ata që i ndenjën pranë. U uroj forcë në këtë moment të vështirë.
Ndërkohë që kryetarja e Komisionit Europian Ursula Von Der Leyen tha se ndihej “thellësisht e trishtuar nga lajmi i largimit të Peter R. de Vries” e se u shprehte ngushëllimet familjarëve dhe të shtrenjtëve të tij.
Ndërkaq familja e Peterit pohoi se i ndjeri qe përfshirë në shumë beteja, por nuk mundi ta fitonte dot luftën. “Në gjunjë nuk mund të jesh i lirë”, thanë ata se kishte qenë motoja gazetarit.
