Teksa shqetësimi për krimin në vend zë një vend të konsiderueshëm mes shqiptarëve, duket se shqetësimi për një shoqëri më të edukuar, më me norma, që nuk e kërkon zgjidhjen tek krimi, e nuk shfryn për çdo gjë mbi Policinë e Shtetit, gjallon fort mes policëve të shtetit, të cilët, nisur edhe nga kazusi sa më poshtë, tashmë nuk mund të shprehin asnjë mendim sa takon kësaj pune.
Ditën e sotme Drejtori i Përgjithshëm i Poliisë Gledis Nano, ka pezulluar nga detyra policen sexy Anisa Kostani, e cila në opinion publik shqiptar njihet marrëdhënien e saj paqësore me një gjarpër. Teksa shumica e popullit i qe sulur Policisë së Shtetit për hir të vrasjes së ndodhur në Elbasan, nënkomisarja e policisë Kostani ka reaguar e indinjuar në fejsbuk, duke e drejtuar gishtin si nga gazetarët që sulmonin policinë e Elbasanit, ashtu edhe drejt popullit të paedukuar që e kërkon zgjidhjen vetëm tek Policia e Shtetit, pa e kthyer ndonjëherë vështrimin nga vetja dhe nga niveli i vet kulturor.
Duke marrë shkasë nga disa pseudogazetarë/e, shkruan nënkomisarja Kostani në fejsbukun personal, që iu duket vetja të arrirë në profesion, por në fat në shkrimet e tyre nuk shpalosin gjë tjetër veçse inat personal dhe injorancë, ju bëj me dije se: “Policia Elbasan nuk ka qenë asnjëherë kaq aktive sa sot, nuk ka pasur asnjëherë kaq arritje sa sot, po c’kërkoni ju? Zero vraasje, zero plagosje, zero do lloj krimi tjetër, vetëm në parajsë ka; nëse e keni me qejf jeni të lirë të shkoni, por kujdes mos digjeni në Ferr rrugës! E nëse do t’ju drejtohesha dhe Unë me të njëjtin fjalor si ju, edhe pse sma lejon etika, por po e bëj sepse s’po mbaj rezerva me jut ë degjeneruar: i keni pas profesorat Don Juan-a që ju kanë dhënë shkollën, sepse me e pas marrë me meritë, të paktën do dinit të artikuloheshit dhe mos paragjykonit, por të shihnit statistikat dhe të vinit me një gjykim. E kjo quhet punë, jo “llogjet e kafeve” që zhgaravisni ju si kodra pas bregut lartë e poshtë nëpër rrjete soiale, mendoj për të vetmen arsye që të merrni pak vëmendjen e munguar. Nëse dëshironi, ua jap unë këtë mundësi duke ju bërë tag, sepse kam jo pak shikueshmëri. Banorët në Elbasan duhet të ndërgjegjësohen, të arsimohen e të kulturohen që në vogëli: e kjo është një punë individuale dhe e famijes, jo e poliisë, por tashmë keni mësuar mirë të drejtoni gishtin drejt poliisë, sepse aq dini dhe aq bëni”.
Një ditë pas këtij statusi, ka reaguar edhe Policia e Shtetit, e cila njofton se nënkomisare Kostani është pezulluar për këtë status në faqen e saj personale në fejsbuk, e se mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, e cila ka një sektor të posaçëm, përmes të cilit komunikon zyrtarisht me median dhe publikun.
Me keqardhje ndoqëm reagimin aspak etik dhe profesional të një oficereje të Policisë së Drejtorisë Vendore të Policisë Elbasan, shkruhet në njoftimin e Policisë, e cila nëpërmjet një postimi në rrjetet sociale ka fyer gazetarët, me pretendimin se gazetarët po përbaltin punën e Drejtorisë Vendore të Policisë Elbasan. Përsa më sipër, Drejtori i Përgjithshëm i Policisë së Shtetit Gledis Nano ka pezulluar menjëherë nga detyra oficeren e Policisë, Nënkomisare Anisa Kostani dhe ka urdhëruar Drejtorinë e Standardeve Profesionale në Drejtorinë e Përgjithshme të Policisë së Shtetit për të nisur hetimin disiplinor ndaj kësaj oficereje, për shkelje të rëndë të Rregullores së Policisë së Shtetit, miratuar me VKM nr. 750 datë 16.09.2015, konkretisht të nenit 209, pika 1 “Shkelja e rëndë e atributeve/kompetencave të policisë pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja të rënda në kryerjen e detyrave”. Sqarojmë opinionin publik se mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, e cila ka një sektor të posaçëm, përmes të cilit komunikon zyrtarisht me median dhe publikun.
Policia e Shtetit është e bindur dhe e vendosur për të krijuar një marrëdhënie partneriteti dhe oponence me median, bazuar në respektin reciprok dhe në të vërtetën.
Policia e Shtetit falënderon gazetarët për punën e tyre në drejtim të informimit të publikut në lidhje me veprimtarinë e organizatës së Policisë së Shtetit dhe kërkon mirëkuptimin e tyre që raste sporadike të mos cënojnë marrëdhëniet korrekte mes gazetarëve dhe Policisë së Shtetit”
Në këto rrethana dhe pas këtyre sqarimeve, mbetet ende e paqartë se përse nënoficerja është pezulluar nga detyra, kur mesazhin e ka ndarë në faqen e saj personale në fejsbuk, e se ai, ashtu si shprehet edhe sqarimi i Policisë së Shtetit, nuk përbën tek e fundit asnjë mendim zyrtar.
