Pas ditësh të tëra thashethemesh mbi shkarkimin e Drejtorit të Përgjithshëm të Policisë së Shtetit Gledis Nano, ka ardhur sot edhe njoftimi për shkarkimin e tij.
Lajmin e bëri me dije ministri i Punëve të Brendshme Blendi Çuçi, gjatë parashtrimit të vendimeve të qeverisë, i cili deklaroi se ky vendim “Lidhet me situatën e krijuar muajt e fundit, situatë që normalisht kërkon një reagim më të fortë dhe një menaxhim më efikas të Policisë së Shtetit”. Cuu deklaroi mes të tjerave se “Për momentin detyrat do t’i ushtrojë nëndrejtori i përgjithshëm i Policisë” dhe se shumë shpejt do të bëhet me dije edhe emri i ri i kreut të Policisë së Shtetit.
Në deklaratën e tij ministri Çuçi nuk dha shpjegime më të thelluara për motivacionet e shkarkimit të Nanos, duke u mjaftuar vetëm me motivacionin e vagullt “për një trajtim më efikas të çështjeve”, ndërkohë që sa i takon ndryshimit të kreut të SHISH-it, Çuçi deklaroi se nuk e kishin ndryshuar, por thjesht kishin emëruar aty nëndrejtorin e ri të SHISH, Olian Tanushi, një vend ky I mbetur vakant prej kohësh, për hir të konfliktit të Presidencës me SHISH-in.
I pyetur se a kishte edhe vetë përgjegjësi për situatën ku ndodhej Policia e Shtetit, meqë drejtohet prej tij, ministri i Punëve të Brendshme Çuçi u përgjigj se “padiskutim, ka shkallë përgjegjësie, por deri tani, Këshilli i Ministrave, qeveria, ka menduar që ndryshimi i menaxhimit nëpërmjet shkarkimit të drejtorit të përgjithshëm të Policisë, është një masë efikase për të pasur një reagim më të fortë në luftën kundër krimit”.
Kujtojmë që njoftimi për një dorëheqje të Gledis Nanos vajti thuajse një javë që endet si lajm nëpër portale të ndryshme.
