Sipas mediave amerikane dhe britanike, Gao Fu, funksionari kinez për Kontrollin dhe Parandalimin e Sëmundjeve (CDC), ka pohuar në një konferencë në qytetin e Chengdu-së, se vendi po shqyrton zyrtarisht përzierjen e vaksinave covid-19, si një mënyrë për t’u rritur efektshmërinë.
Vaksinat që disponohen aktualisht, u shpreh ai, nuk kanë një përqindje mbrojtjeje të lartë. Po merret në konsideratë përzierja e tyre, duke përdorur vaksina të linjave të ndryshme teknike.
Gao konfirmoi gjithashtu që përshtatja e masave për të optimizuar procesin e vaksinimit, përfshi modifikimin e numrit të dozave dhe distancën kohore mes njëra-tjetrës, qe një zgjidhje përfundimtare për çështjet e efektshmërisë.
Kina ka zhvilluar deri më sot 4 vaksina, të miratuara për përdorim publik. Të dhënat e disponueshme deri më tani, dëshmojnë se vaksinat kineze janë prapa sa i takon efektshmërisë krahasuar me vaksinat e tjera.
Vaksina e prodhuar prej Sinovac-ut, ka rezultuar të jetë e efektshme pak më tepër se 50% në Brazil dhe 83.5 % në Turqi, nga një studim i kryer atje.
Ndërkaq për vaksinat e prodhuara nga Sinopharm, nuk ka të dhëna të detajuara sa i takon efektshmërisë. Sipas vetë kompanisë, dy vaksinat e prodhuara prej saj, janë të efektshme 79,4 % dhe 72.5%.
Në fund të marsit, një prej përfaqësuesëve të OBSH-së, u shpreh se vaksinat kineze kishin dorëzuar të dhënat pranë këtij institucioni, të cilat dëshmonin nivele efektshmërie që përputheshin me ato të kërkuara prej OBSH-së.
