Filetoja e viçit është një recetë praktike dhe shijshme. Me pak microgreen majdanozi, kërpudha e domate të thata, mund të përftojmë fare mirë për shumë pak kohë, një pjatë të përsosur për çdo ditë. Ja si ta përgatisim, sipas shef Mondit.
Për 4 persona
Fileto viçi 360 gramë, ( 4 fileto )
Microgreen majdanozi, 12 gramë,
Kërpudha champignon, 4 copë
Domate të thata, 8 copë
Gjalpë, 40 gramw
Rozmarinë e freskët,
Hudhër, 2 thelpinj
Vaj ulliri për marinim
Kripë dhe piper, sipas dëshirës
Vendosim në një pjatë filetot, i marinojmë me vaj, kripë dhe piper të zi të sapobluar, dhe i lëmë rreth 10 minuta të pushojnë (jo në frigorifer).
Vendosim në zjarr një tigan që nuk ngjit, derisa të nxehet mirë, pastaj vendosim filetot të gatuhen, duke i lënë përrreth 3 minuta nga çdo faqe, pastaj, me ndihmën e një pince (jo piruni), i kthejmë të piqen edhe anët.
Ulim zjarrin mesatarisht, shtojmë hudhrën e shtypur të paqëruar, rozmarinën e freskët dhe gjalpin, dhe e vazhdojmë gatimin edhe për rreth 3 minuta, duke u hedhur pwrsipwr gjalpin me ndihmën e një luge. I heqim nga tigani dhe i lëmë në një vend të ngrohtë.
Heqim hudhrën dhe rozmarinën, dhe në tiganin ku kemi gatuar filetot, shtojmë kërpudhat e prera në katër pjesë. I tiganisim për 5 minuta në zjarr mesatar, duke i përzierë vazhdimisht.
Një minutë përpara se të mbarojnë së gatuari kërpudhat, shtojmw edhe domatet e thata, e i gatuajmë sa të zbuten.
I shërbejmë të ngrohta, me majdanoz microgreen, rregulluar me kripë e piper sipas shijes, të shoqëruara me kërpudhat e domatet e thata të tiganit.
