Në një konferencë për shtyp anëtari i kryesisë së PD Fatbardh Kadilli ka rishprehur kërkesën për dorëheqjen e Bashës nga posti i kreut të PD-së, duke këmbëngulur në idenë tij fillestare se kush ka humbur për një kohë kaq të gjatë, nuk ka c’të ofroj më edhe për katër vite të tjera që nuk do dihet si do të përfundojnë.
I pyetur nga gazetarët nëse ai me këtë kandidim po hakmerrej me Bashën, për hir se ai nuk e kishte kandiduar si deputet, Kadilli iu përgjigj se nuk është deputet që prej 2013 dhe ndërkohë ka kontribuar në parti, por kjo lëvizje e tij lidhej me dështimin e përsëritur të Bashës.
Unë nuk jam deputet që prej 2013-s, dhe nuk jam hakmarrë as në 2023-n as në 2017-n, tha Kadilli, por kur shoh një dështim të përsëritur, kur një rrugë e ke provuar një herë dhe dështon, nuk ke pse e provon të njëjtën rrugë, aq më keq për herë të tretë, dhe nuk bëhet fjaë për shqetësime të natyrës emocionale, por janë thjesht politike. Kam kontribuar me vetmohim dhe me vetmohim kam parasysh ekzaktësisht mungesën e pretendimeve për karrierë individuale.
Basha, tha Kadilli, ka detyrë të na ruajë votën të mos na i vjedhin, jo të bëjë inventarizimin e votave që ka vjedhur Rama, e po ashtu edhe një gjë tjetër, t’i japë vlerë votës, që askush të mos e shesë atë. Nëse vota zgjedh mes Lulëzim Bashës dhe një thesi me miell, atëherë ky është problem i Lulëzim Bashës dhe jo i atij që shet votën dhe e këmben Bashën me një thes me miell.
Kandidimin tim nuk kam pse e konsultoj me askënd, përveçëse me ndërgjegjen time dhe vizionin tim, tha Kadilli. Zgjedhjet në PD kanë një afat të paktën statuor. Afati limit është datë 22 korrik e këtij viti. Fakti që unë kandidoj si kryetar, nuk bie ndesh me mandatin si anëtar kryesie që unë do ta mbaj deri kur të mbarojë, pas dy vjetësh. Radikalizimi është një sport që PD e bën prej vitesh, por kur vjen puna, fitoret i ka të pakta, përfundoi përgjigjen e tij Kadilli.
Fjala e Kadillit para gazetarëve
Pushteti përdori çdo mjet për të deformuar vullnetin e shqiptarëve. Nga blerja e votës të përdorimi i çdo teknike ligjore dhe administrative, si ndryshimi i Kodit dhe mbyllja e kufirit me Greqinë. Provat individuale që janë kapur dhe dokumentuar qe do të publikohen do ta konfirmojnë fenomenin. Çdo provë duhet të ndëshkohet sipas ligjit. Dua të falenderoj OSBE-në që u ka dhënë zë këtyre shkeljeve flagrante të procesit, dhe ka rikonfirmuar cilësisht çdo akuzë dhe pretendim të opozitës. Theksoj se ky është dhe duhet të jetë një proces ligjor. Proces që do kohë, por edhe durim, maturi dhe vendosmëri. Por, beteja ligjore nuk mund dhe as duhet të shërbejë për radikalizim politik. Çdo tensionim është i qëllimshëm. Nuk i shërben interesit të demokratëve dhe as shqiptarëve, dhe kërkon të blindojë portën e PD. Barrikada para portës nga ku Lulzim Basha deklaroi që nuk dorëzohet, është e tepërt. Kërkoj mirëkuptimin e të gjithë anëtarëve të PD që janë të stresuar nga lodhja, të hutuar nga pritshmëritë e pa-realizuara dhe të trishtuar nga humbja.
Jam këtu për të konfirmuar edhe një herë vendimin tim për të kandiduar për Kryetar të Partisë Demokratike. Jam këtu për t’i kërkuar edhe njëherë Lulzim Bashës të dorëhiqet. Projekti dhe ekipi tij u provua i paaftë për të prodhuar fitore për demokratët. Si i tillë ka shterruar dhe nuk jep më opsione për të ardhmen. E kemi mbështetur dhe e kam mbështetur me vetëmohim. E theksoj, me vetëmohim, për të na drejtuar në fitore. Nuk ia doli. Nuk qe i zoti. Nuk diti. Dështoi. Sot të gjithë mund të justifikojmë dështimin, por jo faktin se jemi para katër viteve e katër muajve opozitë, në fund të të cilëve nuk e dimë se ç’pret.
Sot, kush thërret Rama Ik! Nuk mund të thërrasë Basha Rri!
Vjedhja e Ramës nuk mund të jetë alibi për Bashën, ashtu si dështimi i Bashës nuk mund të jetë alibi për të mos luftuar Ramën.
